Қазатомөнеркәсіп дивидендтерге 335,2 млрд теңге бағыттауды жоспарлап отыр
Директорлар кеңесі төлемдерді 28 шілдеден бастауды ұсынды
«Қазатомөнеркәсіп» Директорлар кеңесі акционерлерге 2025 жылға бір жай акцияға 1 292,27 теңге мөлшерінде дивиденд бекітуді ұсынды. Айта кетейік, бір жаһандық депозитарлық қолхат (ГДР) бір жай акцияға тең. Бұл туралы ұлттық атом компаниясы AIX биржасына хабарлады, деп хабарлайды Kapital.kz іскерлік ақпарат орталығы.
Директорлар кеңесі компания акционерлеріне дивиденд ретінде 335,2 млрд теңге бағыттауды ұсынды – бұл оның еркін ақша ағынының 75%-ын құрайды.
Сондай-ақ ДК дивидендтерді 2026 жылғы 28 шілдеден бастап төлеуді ұсынды.
«Бұл ұсыныстар 2026 жылғы 26 мамырға жоспарланған акционерлердің жылдық жалпы жиналысында бекітілуге тиіс», - деп түйіндеді компаниядағылар.
Еске сала кетейік, 2024 жыл үшін компания 327,8 млрд теңгеге дивиденд төлеген болатын. Жай акция бойынша дивиденд көлемі 1 264,12 теңгені құрады.
«Қазатомөнеркәсіп» ҰАК – әлемдегі ең ірі уран өндіруші. Компания өзінің еншілес ұйымдарымен және басқа да байланысты құрылымдарымен бірге 14 уран өндіру активіне біріктірілген 27 кен орнын игеруде. Барлық уран өндіру кәсіпорындары Қазақстан аумағында орналасқан.
Компанияның бағалы қағаздары Лондон қор биржасында және Astana International Exchange биржасында орналастырылған. Топтың негізгі клиенттері – бүкіл әлемдегі атом станцияларының операторлары. Компания өз өнімін Азия, Еуропа елдеріне және АҚШ-қа экспорттайды.
2025-2034 жылдарға арналған даму стратегиясына сәйкес, «Қазатомөнеркәсіп» жаңа нарықтарға шығуды көздеп отыр. 2025 жылы еуропалық Axpo Power AG (Швейцария) және ČEZ Group (Чехия) энергетикалық компанияларымен, сондай-ақ жапондық Kansai Electric Power Co., Inc. компаниясымен уран жеткізуге келісімшарттарға қол қойылды. Үндістанға табиғи уран концентраттарын жеткізуге ұзақ мерзімді келісімшарт жасасу бойынша жұмыстар жалғасуда.
Ұлттық компанияның негізгі акционерлері: «Самұрық-Қазына» ӘАҚ – 62,99% және Қазақстан Республикасының Қаржы министрлігі – ҚР Ұлттық қоры арқылы шамамен 12,01% үлеске ие. Акциялардың қалған 25%-ы Лондон (LSE) және Астана (AIX) қор биржаларында еркін айналымда жүр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
