Атырауда пластик қалдықтарды өңдейтін жаңа зауыт ашылады
Кәсіпорын тәулігіне 20 тонна пластик қоқысты өңдеуді жоспарлап отыр
Атырауда пластик қалдықтарды қайта өңдеуге бағытталған ірі инвестициялық жоба қолға алынды. Зауыт тәулігіне 20 тоннаға жуық пластик қалдықты өңдеуді жоспарлап отыр, деп хабарлайды Kapital.kz іскерлік ақпарат орталығы облыстың әкімдікке сілтеме жасап.
Өңір үшін экологиялық маңызы бар бұл өндірістік нысанды «Фибратекс» ЖШС жүзеге асырып жатыр. Жаңа жоба аймақтағы экологиялық ахуалды сауықтыруға және қалдықтарды кәдеге жарату ісін тиімді ұйымдастыруға жол ашады деп жоспарланған.
Кәсіпорын қолданылған ПЭТ-бөтелкелерді қайта өңдеу арқылы жоғары сұранысқа ие полиэфирлі штапельді талшық шығармақ. Зауыттың өндірістік желісі тәулігіне 20 тоннаға жуық пластик қалдықты өңдеуге қауқарлы. Кәсіпорын жоспарланған толық қуатына көшкен кезде жылына 7 мың тонна дайын өнім шығарып, 67 тұрғынды тұрақты жұмыспен қамтиды деп күтіліп отыр.
Өндіріс директоры Тұрлан Нұрлановтың айтуынша, технологиялық процесс негізгі үш кезеңнен тұрады.
«Алғашқы кезеңде пайдаланылған пластик бөтелкелер сұрыпталып, жуылып, өңдеуден өтеді. Соның нәтижесінде флекс деп аталатын ұсақ пластик шикізаты дайындалады. Кейін флекс арнайы қондырғыда жоғары температурада ерітіліп, полиэфирлі талшық алынады. Соңғы кезеңде талшық өңделіп, тұтынуға дайын өнім шығарылады», – деді кәсіпорын басшысы.
Бүгінде дайын өнімді өткізу нарығы да толық айқындалған. Жылына өндірілетін 7 мың тонна өнімнің 3,6 мың тоннасы кәсіпорынның геосинтетикалық материалдар шығаратын өз қажеттілігіне жұмсалады. Ал қалған 2,4 мың тоннасы шетелге экспортталады.
Қазіргі уақытта зауытта өндірістік жабдықтарды орнату және іске қосу-баптау жұмыстары қызу жүріп жатыр. Жоба толық қуатында іске қосылғаннан кейін өңірдегі қалдықтарды қайта өңдеу үлесі артып, жаңа жұмыс орындары ашылады, сондай-ақ бұл аймақтың экспорттық әлеуетін күшейтіп, «жасыл экономиканың» дамуына елеулі үлес қосады, деп атап өтті әкімдікте.
Бұған дейін Алматыда 145,5 млрд теңгеге қоқысты электр энергиясына айналдыратын зауыт салынатыны белгілі болды. Кәсіпорын тәулігіне 2 мың тонна қалдықты өңдеп, 60 МВт-қа дейін электр энергиясын өндіре алады.
Сондай-ақ Астанада тәулігіне 1,5 мың тонна қалдықты қайта өңдейтін экопарк салынатыны хабарланды. Инвестициялық жоба қытайлық EAST HOPE компаниясымен бірлесіп жүзеге асырылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
