Қазақстандағы қонақүйлер мен мейманханлар табысы 69,4 млрд теңгеге дейін өсті
Олар 2026 жылдың бірінші тоқсанында 2 млн келушіге қызмет көрсетіп, көрсетілген қызмет көлемін 13,9%-ға арттырды
2026 жылдың бірінші тоқсанында Қазақстандағы ішкі және келу туризмі кету туризмінен асып түсті: елге 3 млн адам келсе, шетелге 2,47 млн отандасымыз шыққан, деп хабарлайды Kapital.kz іскерлік ақпарат орталығы Ұлттық статистика бюросының мәліметтеріне сілтеме жасап.
«2026 жылғы 1 сәуірдегі жағдай бойынша Қазақстанда орналастыру орындарының саны 4 505-ке жетті. Өткен жылдың бірінші тоқсанымен салыстырғанда олардың қатары 192 нысанға көбейді. Осы кезеңде орналастыру орындары 2 млн келушіге қызмет көрсетті, оның ішінде 802 мыңнан астам адам елдің курорттық аймақтарына барған. 2026 жылдың қаңтар–наурыз айларында орналастыру орындары көрсеткен қызмет көлемі 69,4 млрд теңгеге жетті, бұл өткен жылдың сәйкес кезеңімен салыстырғанда 13,9%-ға артық (ол кезде көрсетілген қызмет көлемі 61,0 млрд теңге болған еді)», - деп атап өтті ҰСБ өкілдері.
Айта кетейік, Қазақстанда «5 жұлдызды» санаттағы 23 қонақүй жұмыс істейді. Бірінші тоқсанда олар 158,0 мың қонақты қабылдады. «4 жұлдызды» санаттағы 45 қонақүй бар, олар үш ай ішінде 113,5 мың қонаққа қызмет көрсетті. Ал «3 жұлдызды» қонақүйлер саны – 26, олардың қызметіне 58,9 мың келуші жүгінген.
Еске сала кетейік, туризмнің Қазақстан экономикасына қосқан үлесі 5 трлн теңгеге жетті. Туристік салаға тартылған инвестиция көлемі өткен жылмен салыстырғанда 33%-ға өсіп, 1,3 трлн теңгені құрады. Қазақстанда іскерлік-конгрестік туризм жоғары экспорттық әлеует танытып отыр. Елде өткізілген 13 халықаралық іс-шара экономикаға шамамен 18 млн доллар табыс әкелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
