Несие жүктемесін азайту және жалақыны өсіру: Үкіметтің жаңа жоспары
Қазақстанда несие пайызы төмендеп, банкроттық рәсімі жеңілдеуі мүмкін
Үкімет азаматтардың борыштық жүктемесін төмендету бойынша жаңа шаралар дайындап жатыр. Бұл туралы Үкіметте өткен баспасөз мәслихатында Ұлттық экономика министрінің бірінші орынбасары Азамат Әмрин мәлімдеді, деп хабарлайды Kapital.kz іскерлік ақпарат орталығы.
Вице-министр халықтың проблемалық берешегін реттеу және Кешенді жоспарда көзделген қарыз алушыларды қорғауды арттыру жөніндегі шаралар туралы айтып берді.
Бүгінде мерзімі өткен берешек тәуекелдері 6,5% деңгейінде сақталуда, ал несиелердің жоғары құны көптеген отбасылар үшін айтарлықтай ауыр жүктеме болып отыр.
Оның сөзінше, шекті жылдық тиімді сыйақы мөлшерлемесін (ЖТСМ) есептеу әдістемесін қайта қарау, қаржы ұйымдарының жосықсыз тәжірибелеріне бақылауды күшейту және әлеуметтік осал топтағы азаматтардың жекелеген санаттары үшін банкроттық рәсімдерін жеңілдету ұсынылып отыр.
Сонымен қатар Азамат Әмрин Қазақстанда еңбекақыны көтеру саясаты жалғасатынын атап өтті. Оның айтуынша, бүгінде еңбекақы төлеу қорының қосылған құндағы үлесі шамамен 30,6%-ды құрайды, ал орташа және медианды жалақы арасындағы алшақтық – 39,2%.
Бұл мәселелерді шешу үшін ең төменгі жалақыны арттыру, жалдамалы жұмыскерлер табысының, азаматтық қызметшілердің жалақысының өсуіру, табиғи монополиялар субъектілерінің өндірістік персоналының орташа жалақысын ұлғайту және мемлекеттік қызметшілердің жалақысын үш жыл сайын индекстеу көзделген. Сондай-ақ әлеуметтік әріптестіктің жүйелі шаралары қарастырылған
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
