Қарағанды облысында металлургиялық кокс өндіретін зауыт салынады
Жобаға 63,5 млрд теңге көлемінде жеке инвестиция тартылмақ
Үкімет Қарағанды облысында металлургиялық кокс өндіретін зауыт салу бойынша энергетика министрлігі мен «Kazakhstan Success Coking Energy» ЖШС арасындағы инвестициялық келісімді мақұлдады. Бұл туралы қаулыға премьер-министр Олжас Бектенов қол қойды, деп хабарлайды primeminister.kz.
Жоба Қарағанды облысы Абай ауданындағы Дубовка кентінде жылына 1 млн тоннаға дейін металлургиялық кокс өндіретін кәсіпорын салуды көздейді. Жобаның жалпы инвестиция көлемі 63,5 млрд теңгені құрайды. Кәсіпорында 500-ге дейін тұрақты жұмыс орны ашылады. Сонымен қатар жерасты шахтасының құрылысы қосымша 500 адамды жұмыспен қамтуға мүмкіндік береді.
Жоба көмір шикізатын терең өңдеуді дамытуға, қосылған құны жоғары өнім шығаруға және Қазақстанның өнеркәсіптік әлеуетін нығайтуға бағытталған. Көмір-химия өнімдері энергетика, ауыл шаруашылығы, металлургия, фармацевтика және басқа да салаларда кеңінен қолданылады.
Жоба аясында кокс импортының орнын айтарлықтай көлемде отандық өнім алмастырады деп күтілуде. Ішкі нарық толық қамтылғаннан кейін өнімнің артық көлемі экспортқа жіберіледі.
Өндірісті іске қосу 2029 жылға жоспарланған. Алғашқы кезеңде зауыттың қуаты жылына 500 мың тонна кокс өндіруге жетеді. 2031 жылдың соңына дейін кәсіпорын толық жобалық қуатына шығып, жылына шамамен 1 млн тонна металлургиялық кокс өндіру көзделіп отыр.
Инвестор құрылыс барысында қазақстандық өндірушілердің тауарлары, жұмыстары мен қызметтерін басымдықпен пайдалануға міндеттеме алды. Бұл отандық жеткізушілердің жүктемесін арттырып, жобаның аралас салаларға экономикалық әсерін күшейтуге мүмкіндік береді.
Бұған дейін үкімет Ақмола облысында астықты терең өңдеу зауытын салу жобасы бойынша Ауыл шаруашылығы министрлігі мен «Азия Алтын Дән» ЖШС арасындағы инвестициялық келісімді мақұлдаған болатын. Сондай-ақ энергетика министрі Ерлан Ақкенженов пен «Karaganda Wind Power» ЖШС төрағасы Шао Юэбо Қарағанды облысында қуаты 500 МВт болатын жел электр станциясын салу жөніндегі инвестициялық келісімдерге қол қойған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
