Қазақстанда су үнемдеген фермерлерге берілетін жеңілдіктер көбейді

Қазақстанда шаруаларды су үнемдеу технологияларына көшуге ынталандырудың негізі қалыптастырылып жатыр. Инфрақұрылым тарту кезінде ұңғымалар қазуға, сондай-ақ су үнемдеу жүйелерін сатып алу мен орнатуға кеткен фермерлер шығынын өтеу үлесі 50%-дан 80%-ға дейін ұлғайтылды, деп хабарлайды Kapital.kz іскерлік ақпарат орталығы.

Сонымен қатар тариф құнына қарай суармалы суға берілетін субсидияның сараланған мөлшері енгізілді. Су үнемдеу технологияларын қолданған жағдайда субсидия көлемі 60%-дан 85%-ға дейін артады.

Қабылданған шаралардың нәтижесінде су үнемдеу технологияларымен қамтылатын алқап көлемі жыл сайын 30-35 мың гектардан шамамен 150 мың гектарға дейін өсті.

Су ресурстары және ирригация министрлігінің мәліметінше, былтыр елде су үнемдеу технологиялары қолданылған жер көлемі 543,5 мың гектар болып, нәтижесінде 874 млн текше метр суармалы су үнемделген.

Қазіргі уақытта министрлік суармалы суға субсидия беру қағидаларына өзгерістер енгізу бойынша жұмыс жүргізіп жатыр. Бұл өзгерістер лазерлік тегістегішті субсидияланатын су үнемдеу технологияларының тізбесіне енгізуді, жерасты суын көтеруге жұмсалатын электр энергиясы шығындарын өтеуді, сондай-ақ субсидияланатын бағыттар қатарына ылғал жинау суаруын және тұзданған топырақты шаю жұмыстарын қосуды көздейді.

Су үнемдеу бағытындағы жұмыс өнеркәсіпті де қамтиды. Су кодексінде өндірістік кәсіпорындардың айналымды және қайталама сумен жабдықтау жүйелеріне кезең-кезеңімен көшуі міндетті талап ретінде белгіленген.

Бұдан бөлек, айналымды және қайталама сумен жабдықтау жүйелеріне көшу жоспарлары орындалмаған жағдайда рұқсат етілген су пайдалану көлемін қысқартуды көздейтін нормативтік-құқықтық актілер де қабылданып жатыр.

Сонымен бірге 2030 жылға қарай жасыл желектерді суару ісін толықтай су үнемдеу технологияларына көшіру жоспарланып отыр.