40 мыңнан астам тауардың Қазақстанда жасалғаны расталды

Қазақстанда отандық тауар өндірушілердің бірыңғай тізілімін қалыптастыру жұмыстары жалғасып жатыр. Бүгінге дейін 40 мыңнан астам тауар қазақстандық өнім ретінде танылған, деп хабарлайды Kapital.kz іскерлік ақпарат орталығы ҚР Өнеркәсіп және құрылыс министрлігіне сілтеме жасап.

Ведомство мәліметінше, e-ondiris.gov.kz ақпараттық жүйесіне 26 257 өтінім түскен. Оның 22 мыңнан астамы қаралып, бұл жалпы көлемнің 80%-дан астамын құрайды.

Нәтижесінде өндірістік қызметі сараптамадан өткен отандық өндірушілердің кеңейтілген базасы жасақталды. Қазіргі таңда тізілімге 5 834 компания енгізілген. Оның ішінде 4 321 кәсіпорын Қазақстан аумағында толық өндіріс жүргізсе, 1 513 кәсіпорын қайта өңделген өнім шығарады.

Тізілім отандық өнімді сатып алуға басымдық беру мақсатында негізгі сатып алу платформаларымен интеграцияланған. Атап айтқанда, «Электрондық мемлекеттік сатып алу» порталында жыл басынан бері 24 762 сатып алу рәсімі өткен. Ал «Самұрық-Қазына» жүйесінде 2 646 сатып алу тіркелген.

Сонымен қатар барлық өтінімдер мақұлдана бермейді. Министрлік дерегінше, өндірістік қызметті бағалау нәтижесінде 1 053 компанияның өтінімі кері қайтарылды.

Бас тартудың негізгі себептері қатарында цифрлық тексерулерден өтпеу, өндірістік талаптардың расталмауы, бейнематериалдардың сәйкессіздігі, сондай-ақ құжаттардың толық болмауы немесе шындыққа сәйкес келмеуі бар. Бұдан бөлек, көшпелі тексерулер барысында бірдей құжаттарды бірнеше өтінімде пайдалану фактілері де анықталған.

Министрлік тізілімді жетілдіру және ұсынылатын деректердің шынайылығын арттыру жұмыстары жалғасатынын атап өтті.