Қазақстанда маркетплейс кейпіндегі қаржы пирамидасы анықталды
Заңсыз схемаға 1,5 мыңға жуық салымшы тартылған
Қазақстанның 14 өңірінде өзін маркетплейс ретінде көрсеткен пирамиданы ұйымдастыру фактілері бойынша тергеу жүріп жатыр, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.
«Қаржылық мониторинг агенттігі «CVK» қаржы пирамидасының қызметіне тосқауыл қойды. Қазіргі уақытта Агенттіктің аумақтық департаменттері елдің 14 өңірінде тергеу амалдарын жүргізіп жатыр. Жоба маркетплейс ретінде таныстырылды: қатысушыларға белгіленген табысы бар әртүрлі пакеттердегі инвестициялық «дүкендерді» сатып алу ұсынылды. Сауда қызметіне еліктеу үшін жеке кабинетте виртуалды пайыздар есептелетін, іс жүзінде орындалған сияқты тапсырыстар мен жоқ тауарлардың «жөнелтілімдері» көрсетіліп тұрған. Негізгі екпін реферальды жүйеге жасалды: қатысушыларға жаңа салымшыларды тартқаны үшін ақшалай бонустар мен бағалы сыйлықтар уәде етілді», - деп хабарлайды ҚМА.
Агрессивті өңірлік маркетинг пен ауқымды жарнамалық науқанның арқасында ұйымдастырушылар құқыққа қайшы схемаға 1,5 мыңға жуық салымшыны тарта алған, деп түсіндірді Агенттік. Жобаны ілгерілету үшін жабық үгіт-насихат кештері, кеңселердің мерекелік ашылуы және бұқаралық таныстырылымдар өткізілген. Бұл акциялар әлеуметтік желілерде белсенді түрде жарияланып, халықтың сенімін қалыптастыру үшін пайдаланылған.
Ақша қаражатын шығару криптовалюталық платформа арқылы жүзеге асырылып, кейіннен банктік шоттарға аударылып отырған. Агенттіктің жедел шараларымен 474 мың USDT сомасындағы криптоактивтерді бұғаттау қамтамасыз етілді.
Тергеу жалғасуда. ҚР ҚІЖК-нің 201-бабына сәйкес өзге ақпарат жария етуге жатпайды. «CVK» қаржы пирамидасының қызметінен зардап шеккен қазақстандықтардан тұрғылықты жері бойынша Қаржылық мониторинг агенттігінің аумақтық департаменттеріне хабарласу сұралады.
Бұған дейін «Реалды активтерге инвестиция жасайтын халықаралық экожүйе» ретінде таныстырылған жоба Қазақстанда қаржы пирамидасы болып шықты.
Абай облысында қаржы пирамидасы 1,5 мың қазақстандықтың қаражатын иемденген. ELL QUATY қаржы пирамидасы тұтыну кооперативі ретінде жұмыс істеген. Ұйым салымшылардың 6,8 млрд теңгесін иемденіп кеткен.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
