- Басты бет
- Экономика
- Ұлытау облысында құны $40 млн болатын инвестициялық жобаларға тоқтап қалу қаупі төнді
Ұлытау облысында құны $40 млн болатын инвестициялық жобаларға тоқтап қалу қаупі төнді
Құзырлы мемлекеттік орган жер қойнауын пайдалануға арналған экологиялық рұқсаттарды рәсімдеу мерзімін ұзартудан бас тартқан
Құзырлы орган шетелдік инвестор «MQ EMIRATES GROUP Ltd.» компаниясына Ұлытау облысындағы күміс пен алтын кен орнында жұмыс істеу үшін экологиялық рұқсат мерзімін ұзартудан бас тартқан, деп хабарлайды Kapital.kz іскерлік ақпарат орталығы Бас прокуратураның Инвесторлардың құқықтарын қорғау комитетіне сілтеме жасап.
«Комитет Қазақстанда жер қойнауын пайдалану саласындағы жобаларды жүзеге асырып жатқан «MQ EMIRATES GROUP Ltd.» компаниясының құқықтарын қалпына келтіруге ықпал етті. Компания қатты пайдалы қазбалардың төрт кен орны бойынша жер қойнауын пайдалану құқығын алу аукционын жеңіп алып, бюджетке қол қою бонусы ретінде 900 миллион теңгеден астам қаражат аударған. Инвестицияның жалпы көлемі 40 миллион доллардан асады», - делінген хабарламада.
Инвестор қажетті құжаттарды өткізу мерзімін ұзартудан мемлекеттік органның бас тартқанына наразылық білдіріп, шағым түсірген.
«Өтінішті қарау кезінде құжаттардың басым бөлігі дайын екені анықталды: компания төрт өңірде қоғамдық тыңдаулар өткізіп, «Солтүстік Қоптас» кен орны бойынша оң экологиялық қорытынды алған. Шағымды қарау қорытындысы бойынша мемлекеттік орган экологиялық рұқсаттарды ұсыну мерзімін бір жылға ұзартты. Қабылданған шешім инвестициялық жобаларды іске асыруды жалғастыруға және Қазақстанға келген шетелдік инвестицияларды сақтап қалуға мүмкіндік береді», - деп түйіндеді ведомство.
Құқықтары бұзылған немесе әкімшілік кедергілерге тап болған инвесторлардың 115 Call-орталығына хабарласуына болады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
