Enbek.kz-те наурызда ең жоғары жалақы ұсынылған кәсіптер белгілі болды

2026 жылдың наурыз айында Enbek.kz электронды еңбек биржасында жұмыс берушілер 102,6 мың бос жұмыс орнын жариялады, ал жұмыс іздеушілер 107,1 мың түйіндеме орналастырды. 2026 жылдың басынан бері платформада 304,3 мың бос жұмыс орны және 394,4 мың түйіндеме жарияланған, деп хабарлайды Kapital.kz іскерлік ақпарат орталығы еңбек және халықты әлеуметтік қорғау министрлігінің баспасөз қызметіне сілтеме жасап.

Ақпан айымен салыстырғанда бос жұмыс орындарының саны 3,7%-ға артқан, ал түйіндемелер саны 14,3%-ға азайған. Соның нәтижесінде еңбек ұсынысы мен сұранысы арасындағы алшақтық айтарлықтай қысқарды: қаңтарда түйіндемелер саны бос жұмыс орындары шамамен 60 мыңға көп болса, ақпанда бұл айырма 26 мыңға дейін төмендеген, ал наурызда шамамен 4,5 мың түйіндемені құрады.

Салалық құрылым бойынша сұраныста білім беру (22,6 мың бос орын) және өзге қызмет түрлерін ұсыну (21,2 мың бос орын) көш бастап тұр. Денсаулық сақтау және халыққа әлеуметтік қызмет көрсету салаларында (8,7 мың) және ауыл, орман және балық шаруашылығында (7,9 мың бос орын) да сұраныс жоғары.

Өңірлік бөлініс бойынша ең көп бос жұмыс орындары Түркістан (7,7 мың), Қарағанды (7,6 мың), Астана (7,2 мың), Павлодар (7,2 мың) және Атырау облыстарында (6,5 мың) тіркелген.

Біліктілік деңгейі бойынша сұраныста бос орындардың шамамен 40%-ы орта деңгейлі мамандарға тиесілі. Төмен білікті мамандарға сұраныс 31%-ды, ал жоғары білікті мамандарға сұраныс 29%-ды құрайды.

Жұмыс іздеушілер арасында 35 жасқа дейінгі азаматтар басым – барлық түйіндемелердің 42%-ы. 35-44 жас аралығы – 26%, 45-54 жас – 20%, 55 жастан жоғарылар – 12%. Гендерлік тұрғыда үміткерлердің 54%-ы – әйелдер, 46%-ы – ерлер.

Біліктілік деңгейі бойынша ұсыныс құрылымы да сұранысқа ұқсас: түйіндемелердің 42%-ы орта деңгейлі мамандарға, 30,5%-ы жоғары білікті, 27,5%-ы төмен білікті үміткерлерге тиесілі.

Наурыз айында ең жоғары жалақы ұсынылған бос жұмыс орындарының қатарында заңгерлік бөлім басшысының орынбасары (≈1,4 млн теңге), бағдарламалық жасақтама архитекторы (≈1,38 млн теңге) және өндіруші өнеркәсіптегі өндіріс басшысы (≈1,14 млн теңге) бар.

Ал жұмыс іздеушілер арасында ең жоғары жалақы күткендер HR бизнес-серіктес (≈4,2 млн теңге), каротажшы (≈3,0 млн теңге) және өнеркәсіптегі зертхана басшысы (≈2,5 млн теңге) лауазымдарына үміткерлер болды.

Бұған дейін электронды еңбек биржасында 3,6 млн теңгеге дейінгі жалақы ұсынылғаны хабарланған еді.

ANCOR Central Asia «Жалақы және компаниялардың жоспарлары 2025-2026» атты сауалнама жүргізді. Нәтижесінде компаниялардың 62%-ы инфляция деңгейін ескере отырып барлық қызметкерлердің жалақысын арттыруды жоспарлап отырғаны анықталды. Тағы 27%-ы жекелеген санаттар мен негізгі қызметкерлер үшін ғана көтеруді көздейді. Жұмыс берушілердің тек 4%-ы 2026 жылы жалақыны өсіруді жоспарламайды.

Үкімет тарапынан да халық табысын арттыруға бағытталған шаралар әзірленіп жатқаны хабарланды. Жалақыны өсіруге ынталандыру тетіктері және азаматтардың қаржылық жүктемесін азайту көзделуде.

Бұған дейін Премьер-министрдің орынбасары – ұлттық экономика министрі Серік Жұманғарин 2026 жылы халықтың нақты табысының өсімі 2-3%-дан жоғары болуға тиіс екенін айтқан еді. Оның сөзінше, бұл тұрақты әрі сапалы экономикалық өсім мен инфляцияны төмендету есебінен қамтамасыз етілмек.

Президент Қасым-Жомарт Тоқаев үкіметтің кеңейтілген отырысында халық табысын арттыру бағдарламасы қазіргі экономикалық ахуалға сай болуы тиіс екенін атап өтті. Елде инфляция айтарлықтай өсіп, халықтың нақты ақшалай табыстары соңғы бес жылдағы ең төмен қарқынмен өсіп отырғаны айтылды.