QazTrade Қытайда қазақстандық бизнесті ілгерілету үшін Уханьда офис ашады

Ухань Қытайдағы қазақстандық бизнес үшін жаңа стратегиялық нүктеге айналуда. Осы негізгі көлік-логистикалық хабта – «тоғыз провинцияның тоғысқан жерінде» – QazTrade өкілдігінің ашылуы компанияларға келіссөз жүргізумен шектелмей, қытайлық серіктестермен сол жерде тікелей жұмыс істеуге мүмкіндік береді, деп хабарлайды Kapital.kz іскерлік ақпарат орталығы сауда және интеграция министрлігінің баспасөз қызметіне сілтеме жасап.

QazTrade-тің серіктес офистері қазірдің өзінде Хэфэй, Сиань, Чанша, Нанкин, Тяньцзинь, Чэнду және Циндао қалаларында жұмыс істеп тұр.

«Қазір біз жұмысты бизнес тек келіссөздер үшін емес, нарықта тұрақты жұмыс істей алатындай етіп құрып жатырмыз. Бұл үшін Қытай бойынша осындай желі қажет. QazTrade тек компанияларды сүйемелдеп қана қоймайды, біз олардың қытайлық серіктестермен тікелей жұмыс істеуіне көмектесеміз. Осы тұрғыда Ухань өте маңызды қала. Бұл – сұранысы жоғары бірнеше өңір тоғысатын ірі логистикалық хаб», – деді QazTrade бас директоры Айтмухаммед Алдажаров.

Уханьда сондай-ақ QazTrade пен қытайлық GuanYu International Supply Chain компаниясы арасында келісімге қол қойылды. Логистика және ҚХР нарығында шетелдік өнімді ілгерілетуге маманданған бұл компаниямен жасалған құжат Қытайдың орталық бөлігінде қазақстандық өнімді ілгерілетуді, B2B кездесулер ұйымдастыруды, келіссөздерді сүйемелдеуді және жеткізілімдерді қолдауды көздейді.

QazTrade деректеріне сәйкес, Ухань орналасқан Хубэй провинциясымен Қазақстанның тауар айналымы 2025 жылы 163,6 млн долларды құрап, 12,1%-ға өскен.

Еске салайық, Циндаода өткен сауда-экономикалық миссия қорытындысы бойынша қазақстандық компаниялар қытайлық серіктестермен жалпы сомасы 125 млн доллар болатын келісімдерге қол жеткізді. Ал Сиань қаласында Ұлытау облысы мен Шэньси провинциясы арасындағы сауда-экономикалық ынтымақтастық форумында жалпы сомасы 12,5 млрд теңгеге алты меморандумға қол қойылды.