Қазақстан 100 мың шаршы шақырым жерге барлауды бюджет есебінен жүргізбек
Жеке инвесторлар тәуекел етпейтін, зерттелмеген аймақтардың картасы бюджет қаржысына жасалады
Қазақстанда мемлекеттік геологиялық барлау жұмыстары күшейтіліп, 100 мың шаршы шақырым аумақты қамтитын зерттеу басталады. Бұл туралы Қазақстанның Өнеркәсіп және құрылыс вице-министрі Иран Шархан «GEOSCIENCE & EXPLORATION CENTRAL ASIA» форумында мәлімдеді, деп хабарлайды Kapital.kz іскерлік ақпарат орталығы.
Оның айтуынша, мемлекет геологиялық зерттеулерден шет қалмай, жаңа кезеңге өтуді көздеп отыр.
«Биылғы жылдан бастап біз мемлекеттік геологиялық зерттеу бөлігінде далалық жұмыстарға шығып, 100 000 шаршы шақырымды қамтимыз. Кейінгі қысқа мерзімді, орта мерзімді, яғни үш жылдық кезеңде бұл қажеттіліктерге шамамен 240 млрд теңге бөлу жоспарланып отыр. Бұл қаражат қазірдің өзінде бөлініп жатыр», - деді деді вице-министр.
Билік бұл инвестициялар жер қойнауын зерттеу деңгейін арттырып, жаңа кен орындарын ашуға мүмкіндік береді деп есептейді.
Оның сөзінше, саладағы реформалар да нәтижесін беріп отыр. Соңғы жылдары геологиялық барлауға берілген лицензиялар саны айтарлықтай өсіп, қазіргі таңда олардың саны 3 мыңға жуықтаған. Сонымен қатар, соңғы бес жылда жеке инвестициялар көлемі 1 млрд доллардан асқан.
Вице-министрдің айтуынша, мемлекеттік барлау жұмыстары жеке инвесторларды тартуға бағытталады.
«Бұл негізінен салаға қосымша инвестициялар тарту үшін жасалады. Яғни, біз геологиялық зерттелу деңгейін арттырамыз, кейін оның нәтижелерін жариялап, танысуға уақыт береміз және біздің платформамызда сауда аукциондарының тиісті рәсімдерін өткіземіз», - деді Иран Шархан.
Осылайша, мемлекет зерттеу нәтижелерін ашық жариялап, кейін оларды аукцион арқылы нарыққа ұсынуды жоспарлап отыр. Вице-министр бұл тәсіл жер қойнауын тиімді игеруге және жаңа инвестициялық жобаларды іске қосуға мүмкіндік береді деп есептейді.
Еске салсақ, бүгін Астанада Орталық Азия елдері үкіметтерінің өкілдері, бейінді мемлекеттік органдарды, ұлттық геологиялық қызметтерді және жетекші салалық компанияларды біріктіретін GEOSCIENCE & EXPLORATION CENTRAL ASIA халықаралық геологиялық форумы басталды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
