Ұлытауда алғашқы көтерме-тарату орталығының құрылысы аяқталуға жақын

Премьер-министрдің орынбасары – ұлттық экономика министрі Серік Жұманғарин жұмыс сапарымен Ұлытау облысына барды. Сапар аясында ол агроөнеркәсіп кешені нысандарының құрылыс барысымен танысып, өңір фермерлерімен кездесу өткізді, деп хабарлайды Primeminister.kz.

Кездесу барысында ауыл шаруашылығының қазіргі жай-күйі мен аграршылардың өзекті мәселелері талқыланды. Облыс құрылғаннан бері инвесторлардың қатысуымен жалпы құны 3 млрд теңгені құрайтын 4 жоба жүзеге асырылған. Қазіргі уақытта жаңа инвестициялық жобаларды іске асыру жұмыстары жалғасуда. Олардың қатарында Times Agro Holding компаниясының қатысуымен агроөнеркәсіптік кластер құру және «Samga Agro»-мен бірлесіп Жезқазғанда 500 басқа арналған сүт-тауар фермасын салу бар.

Ауыл шаруашылығы вице-министрі Аманғали Бердалин 2026 жылы басталған Мал шаруашылығын дамытудың кешенді жоспары аясындағы жеңілдетілген несиелеу мүмкіндіктері туралы баяндады. Өңірдің табиғи ерекшеліктерін ескере отырып, ол жайылымдық жерлерді тиімді пайдалану арқылы көшпелі мал шаруашылығын дамытуға баса назар аударды. Осы мақсатта жайылымдарды суландыруды, жылжымалы вагондарды сатып алуды және өзге де ілеспе шығындарды қаржыландыруды көздейтін «Жайлау» бірыңғай несиелік өнімі іске қосылады.

Кездесу барысында фермерлер бірқатар түйткілді мәселелерді көтерді. «Кеңгір» шаруа қожалығының басшысы Ардақ Нұржанов «ҚазАгроҚаржы» арқылы лизингке алынған ауыл шаруашылығы техникасына өңірде сервистік орталықтардың жоқтығына байланысты кепілдік қызмет көрсету қиын екенін атап өтті. Вице-премьер «ҚазАгроҚаржыға» компания өкілдерінің жергілікті жерде жұмысын ұйымдастыруды тапсырды. Ал өнеркәсіп және құрылыс министрлігіне Қазақстан автокөлік өндірушілері қауымдастығымен бірлесіп сервистік орталықтар ашу және Жезқазғанда сұранысқа ие ауыл шаруашылығы техникасының қолжетімділігін қамтамасыз ету жүктелді.

Сондай-ақ егістіктерді киіктерден қорғау мәселесі көтерілді. Биыл да ауыл шаруашылығы алқаптарын мамандар мен техника тарта отырып қорғау жұмыстары жалғасатыны атап өтілді. Бұдан бөлек, сақтандыру тетіктерін енгізу мүмкіндігі қарастырылуда.

«Самға» ЖШС директоры Абай Байділдә инфрақұрылымды дамыту, атап айтқанда су мен электр энергиясын тарту мәселелерін көтерді. Сондай-ақ суармалы егіншілікті дамытуға қажетті жерасты су қорларының жеткілікті деңгейде зерттелмегені айтылды. Осыған байланысты әкімдікке су ресурстары және ирригация министрлігімен бірлесіп геологиялық зерттеулер жүргізу және су ресурстарын бағалау мүмкіндігін қарастыру тапсырылды.

Кездесу қорытындысы бойынша вице-премьер Ұлытау облысы жаңа өңір ретінде бірқатар жүйелі міндеттерге тап болып отырғанын атап өтті. Үкімет өңірде ауыл шаруашылығы мен бизнесті дамытуға кешенді қолдау көрсетуді жалғастырады.

Фермерлермен кездесуден кейін вице-премьер ағымдағы жылға және 2027–2029 жылдарға арналған жоспарлы кезеңге өңірдің бюджеттік қамтамасыз етілуіне қатысты кеңес өткізді. Өңірлік стандарттар жүйесі бойынша облыстың артта қалуын қысқарту шараларына ерекше назар аударылды. Жүйе ұсынған деректерге сәйкес, Ұлытау облысы ел бойынша базалық инфрақұрылыммен ең төмен деңгейде қамтамасыз етілген өңір болып отыр.

Жұмыс сапары барысында вице-премьер мал шаруашылығы мен жемшөп дақылдарын өсіруге маманданған Kengir AGRO агроөнеркәсіп кешенінің құрылысымен танысты. Қазіргі уақытта нысанда әкімшілік-тұрмыстық кешен салынған. Биыл 500 гектар алқапта суару жүйесін іске қосу жоспарланып отыр, оның 150 гектары картопқа, қалғаны жемшөп дақылдарына бөлінеді. Компания жайылымдық жүйені қолдана отырып, мал шаруашылығының аустралиялық моделін енгізуді көздеп отыр. Қазірдің өзінде 14 ауылдық округте ірі қара мал өсіру шаруашылықтары құрылған. Алдағы жоспарлар қатарында «Игілік» және «Береке» бағдарламалары арқылы асыл тұқымды мал сатып алу, сондай-ақ 400 басқа арналған сүт-тауар фермасын салуды аяқтау бар.

Серік Жұманғарин өңірдегі алғашқы көкөніс сақтау қоймасы бар, қуаттылығы 15 мың тонна болатын «Samadi A Group» ЖШС көтерме-тарату орталығының құрылысымен танысты. Нысанды пайдалануға беру осы жылдың күзіне жоспарланған. Сонымен қатар кәсіпорын «Бәйтерек» холдингі және Аграрлық несие корпорациясымен бірлесіп өңірде ет өңдеу, шұжық және консерві өнімдерін өндіру жобасын пысықтайды.

Еске салайық, 2025 жылы Ұлытау облысындағы ауыл тұрғындарын сумен қамтамасыз ету үшін Арнайы мемлекеттік қордан 570 млн теңге бөлінген.