Астана тұрғындарының көлік салығы бойынша берешегі 7 млрд теңгеге жетті
Жыл басынан бері бюджетке жылжымалы мүлік бойынша 10 млрд теңгеден астам қаражат түскен
Астанада жеке тұлғалардың көлік құралдарына салынатын салықтан 2026 жылдың басынан бері қала бюджетіне 10 млрд теңгеден астам қаражат түсті, деп хабарлады елорда әкімдігі.
Сонымен қатар, Астана қаласында көлік салығы бойынша берешек көлемі 7 млрд теңгені құрайды. Қалалық мемлекеттік кірістер департаменті қолданыстағы заңнамаға сәйкес, мерзімі өткен әр күн үшін өсімпұл есептелетінін еске салды.
Ведомство мәліметінше, борышкерлерге қатысты мәжбүрлеп өндіріп алу шаралары қолданылады. Олардың қатарында хабарлама жолдау, салық бұйрығын шығару және материалдарды жеке сот орындаушыларына беру бар. 1 айлық есептік көрсеткіштен асатын берешек мәжбүрлі түрде өндіріп алынады, ал салық бұйрығын орындау мерзімі 30 жұмыс күнін құрайды.
Тұрғындар берешегінің бар-жоғын kgd.gov.kz, eGov.kz порталдары және eSalyq Azamat мобильді қосымшасы арқылы тексере алады.
Уақытша елден шығуға қойылатын шектеулер туралы ақпарат aisoip.adilet.gov.kz сайтында қолжетімді.
Еске салайық, елімізде жол қауіпсіздігін күшейту бойынша бірқатар шаралар ұсынылуда. Атап айтқанда, қалаларда орташа жылдамдықты өлшейтін камераларды енгізу, құқық бұзушылықтар үшін жазаны қатаңдату және тәртіпті жүргізушілерді ынталандыру жүйесін қатар енгізу қарастырылып жатыр.
Алматы қаласында үш адамның өмірін қиған жол-көлік оқиғасынан кейін парламентте құқықтық тәртіп жүйесінің жай-күйі қызу талқыланды. Депутат Бақытжан Базарбек ІІМ жүйесінде ауқымды өзгерістер қажет екенін айтып, сын пікір білдірді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
