Медеу маңындағы 288 гектар жер мемлекетке қайтарылды
Жер телімдерінің жалпы құны 17 млрд теңгеден асады
Алматыдағы «Медеу» табиғи паркінің маңында орналасқан екі жер телімі мемлекет меншігіне қайтарылды, деп хабарлайды Kapital.kz іскерлік ақпарат орталығы Алматы қаласы прокуратурасының баспасөз қызметіне сілтеме жасап.
«Алматы қаласының прокуратурасы «Медеу» өңірлік табиғи паркінің шекаралас аумағындағы жалпы көлемі 288 гектарды құрайтын жер телімдерін мемлекетке қайтарды. Қадағалау қызметі барысында жалпы аумағы 288 гектар болатын екі жер учаскесінің заңсыз түрде жеке меншікке берілгені анықталды», – делінген хабарламада.
Даулы жер телімдері су қоры бар ауыл шаруашылығы мақсатындағы жерлерге жатады және оларды жекешелендіруге жатпайды.
Жетісу аудандық прокуратурасының талап-арызы бойынша сот жасалған мәмілелерді жарамсыз деп таныды. Алматы қалалық сотының апелляциялық алқасы бірінші сатыдағы шешімді өзгеріссіз қалдырды. Нәтижесінде құны 17 млрд теңгеден асатын жер телімдері мемлекет меншігіне қайтарылды.
Айта кетейік, бұған дейін 2025-2027 жылдары жергілікті бюджет есебінен Медеу жоғары таулы мұз айдынын жаңғырту жоспарланғаны хабарланған болатын. Жоба аясында жаңа тоңазытқыш жабдықтары, мұзды бақылауға арналған AI-жүйе, ашық бассейн және серуен маршруттары бар экопарк салу көзделген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
