1 сәуірдегі жағдай бойынша 167 мың қазақстандық атаулы әлеуметтік көмек алды

2026 жылғы 1 сәуірдегі жағдай бойынша атаулы әлеуметтік көмек (АӘК) 31,1 мың отбасынан 167,4 мың адамға 7,9 млрд теңге сомасында тағайындалды. Биыл бұл мақсатқа бюджеттен 62,7 млрд теңге қарастырылған, деп хабарлайды Kapital.kz іскерлік ақпарат орталығы еңбек және халықты әлеуметтік қорғау министрлігінің баспасөз қызметіне сілтеме жасап.

Бұған дейін хабарланғандай, АӘК-тің негізгі мақсаты – ақшалай төлемдер түріндегі қолдау көрсету және еңбекке қабілетті отбасы мүшелерін жұмыспен қамту шараларына тарту арқылы отбасын қиын өмірлік жағдайдан шығару.

АӘК аясында:

• табысы кедейлік шегінен аспайтын азаматтарға әлеуметтік көмек тоқсан сайын тағайындалады;

• аз қамтылған отбасылардағы 1 жастан 6 жасқа дейінгі балаларға ай сайын әр балаға 1,5 АЕК мөлшерінде қосымша төлем беріледі. 1 сәуірдегі жағдай бойынша мұндай төлем АӘК алушылар қатарындағы 51,7 мың мектепке дейінгі жастағы балаға 942,1 млн теңге көлемінде тағайындалды;

• жұмыспен қамтуға жәрдемдесу шаралары қарастырылған: жұмысқа орналастыру, жеке ісін ашуға ниетті отбасыларға гранттар беру, қажет болған жағдайда біліктілікті арттыру курстарына жіберу және басқа да шаралар.

Қазіргі уақытта қазақстандықтар АӘК тағайындауға өтінішті тұрғылықты жері бойынша мансап орталығына, ауылдық округ әкіміне жүгіну арқылы немесе электрондық үкімет порталы (egov.kz) арқылы бере алады.

Бұған дейін АӘК алушылар санының 30%-ға азайғаны хабарланған болатын.

Сондай-ақ Қазақстанда атаулы әлеуметтік көмекті тағайындау кезінде жасанды интеллектті қолдану жоспарланып отыр. Пилоттық режимде әлеуметтік қолдау шараларын көрсету барысында отбасының әл-ауқатын анықтауға арналған скорингтік модель іске қосылды.