Тимур Турлов Freedom AI-ды не үшін құрды
Компания АХҚО-да 5 мамырда тіркелді
Freedom AI Ltd компаниясы NVIDIA-мен серіктестікте Қазақстанда AI-инфрақұрылымын дамыту жобасын іске асыру үшін құрылды. Бұл туралы Kapital.kz іскерлік ақпарат орталығының тілшісіне Freedom Holding Corp. баспасөз қызметі хабарлады.
«Компания Freedom экожүйесінің ішінде де, сыртқы клиенттер үшін де пайдаланылуы мүмкін жаңа буынның есептеу қуаттарын құрумен және пайдаланумен айналысатын болады», - деп хабарлады холдинг Kapital.kz сауалына берген жауабында.
Кәсіпкер Тимур Турлов «Астана» халықаралық қаржы орталығының алаңында Freedom AI компаниясын 2026 жылғы 5 мамырда тіркеді. АХҚО-ның тәуелсіз реттеушісі – AFSA сайтында бұл активтің СЕО-сы ретінде Ренат Туканов көрсетілген. Ол Freedom Holding Corp. компаниясының технологиялар жөніндегі бас директоры қызметін атқарады.
AFSA сайтында жаңа компания мынадай қызмет түрлерімен айналысатыны хабарланған:
· Қосымшалар хостингі;
· Техникалық құжаттаманы әзірлеу және жүйелік архитектура саласындағы қызмет;
· Мәліметтерді өңдеу бойынша қызмет.
Еске сала кетейік, 2025 жылдың қарашасында Freedom Holding Corp. NVIDIA және OpenAI серіктесі болды. Бұл келісімдерге Вашингтондағы C5+1 саммиті аясында қол қойылды. Сол кезде Қазақстан мен NVIDIA қуаттылығы 100 МВт болатын, құны 2 млрд долларлық егеменді жасанды интеллект орталығын құратыны белгілі болды. Тиісті келісімге 7 қарашада АҚШ-та холдинг, NVIDIA және Қазақстанның Жасанды интеллект және цифрлық даму министрлігі арасында қол қойылды.
Freedom өкілдері экзафлопстық AI-орталығын Қазақстанда салу жоспарланғанын атап өтті. Оны холдинг басқарады, ал орталық NVIDIA инфрақұрылымы негізінде жұмыс істейтін болады. Холдинг жобаны қаржыландыру және іске асыру бойынша негізгі серіктес болуға ниетті. Министрлік AI-дың ауқымды инфрақұрылымын орналастыру және пайдалану үшін қолайлы жағдайлар жасауға ықпал етеді, сондай-ақ Жасанды интеллект академиясын және инженерлер мен зерттеушілерді даярлауға арналған зерттеу зертханасын құру сияқты бастамаларды қолдайды.
«Деректерді өңдеу орталықтарының (ДӨО) алқабы» экожүйесін Екібастұз энергия торабының энергетикалық қуаттары негізінде құру жоспарланып отыр. Тұжырымдамада нысанды кезең-кезеңімен дамыту, қуаттарды іске қосудың нақты белгіленген параметрлері және салынған энергетикалық инфрақұрылымды пайдалану қарастырылған. Жоба аясында ұзындығы 15 км электр беру желілерін және қуаттылығы 300 МВт, болашақта 1 ГВт-қа дейін кеңейту мүмкіндігі бар төмендеткіш қосалқы станциялар инфрақұрылымын салу жоспарланып отыр.
Арнайы аймақ аумағында есептеу инфрақұрылымын, бұлттық сервистерді және AI-мен жұмыс істеуге арналған қуаттарды орналастыру көзделіп отыр. Ол үшін Екібастұз ГРЭС-1 ауданынан 200 га жер телімі бөлінді, «болашақта бұл аумақты 1300 га-дан асыру мүмкіндігі бар».
Жоба инвесторлары үшін арнайы жағдайлар жасалады: инфрақұрылым, тариф белгілеу және арнайы экономикалық аймақтар принципі бойынша салықтық преференциялар. Жобаға салынатын инвестицияның болжамды көлемі – шамамен 30 млрд доллар. Қазірдің өзінде ірі халықаралық компаниялармен келіссөздер жүргізіліп жатқаны атап өтілді.
2026 жылдың ақпанында Ренат Туканов Kapital.kz сайтына Орталық Азиядағы ең ірі егеменді жасанды интеллект орталығын қаржыландыру үшін холдинг Қазақстаннан және шетелден инвесторлар пулынан қарыз қаражатын тартуға ниетті екенін хабарлады.
«Мұндай жобаға салынатын инвестиция көлемі айтарлықтай үлкен екенін түсіну керек – ол шамамен 2 млрд долларға бағаланады. Нақтылап өтсем, мемлекет бұл жобаға тек реттеу және басқа да мәселелер бойынша қатысады, оның тарапынан инвестиция қарастырылмаған», - деп атап көрсетті Ренат Туканов.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
