• Басты бет
• Технологиялар
• elicense.kz порталында енді Әзірбайжан, Түркия мен Қырғызстанға жүк тасымалдауға рұқсат алуға болады

elicense.kz порталында енді Әзірбайжан, Түркия мен Қырғызстанға жүк тасымалдауға рұқсат алуға болады

Порталда шетелдік рұқсат бланкілерін алуға арналған бағыттар тізімі кеңейтілді

elicense.kz порталында шетелдік рұқсат бланкілерін алуға арналған бағыттар тізімі кеңейтілді. Қазақстандық жүк тасымалдаушылар енді Әзірбайжан, Түркия және Қырғызстанға кіруге электронды рұқсатты онлайн рәсімдей алады, деп хабарлайды Kapital.kz іскерлік ақпарат орталығы «ҰАТ» АҚ баспасөз қызметіне сілтеме жасап.

Шетелдік рұқсат бланкісі – бұл қазақстандық тасымалдаушыға нақты шетелдік мемлекеттің аумағы арқылы жүктерді тасымалдау құқығын беретін құжат. Қазақстан мұндай рұқсаттармен екіжақты негізде алмасады.

«Тасымалдаушы үшін бұл ведомстволарға аз баруды және жұмысқа көбірек уақыт бөлуді білдіреді. «Е-лицензиялау» платформасы дәл осы бағытта дамып келеді – мүмкіндігінше көп рұқсат беру рәсімдерінен онлайн өтуге жағдай жасау», – деп атап өтті ҚР ЖИЦДМ Мемлекеттік қызметтер комитеті төрағасының орынбасары Ержан Ақтаев.

Айта кету керек, бұл қызметті көлік құралдары Қазақстан Республикасында тіркелген және халықаралық автомобиль тасымалдарына рұқсаты бар қазақстандық тасымалдаушылар (заңды тұлғалар, жеке кәсіпкерлер) пайдалана алады.

Қызметті пайдалану үшін пайдаланушыға келесі әрекеттерді орындау қажет:

• elicense.kz порталында авторизациядан өтіп, «Көлік» бөліміне өту;

• «Қазақстан Республикасы ратификациялаған халықаралық шарттарға сәйкес Қазақстан Республикасының тасымалдаушыларына шетелдік мемлекеттің аумағы бойынша жүруге рұқсат беру» қызметін таңдап, «Қызметке онлайн тапсырыс беру» батырмасын басу;

• өңірді/қаланы көрсету және РММ таңдау; ұйымның БСН-ін, өкілдің ТАӘ мен оның лауазымын енгізу;

• ЗТ тіркеу мәліметтерін, мекенжайын толтырып, «Келесі» батырмасын басу;

• КҚ туралы мәліметтерді қосу, содан кейін шетелдік рұқсаттарға деген қажеттілік бойынша мәліметтерді (мемлекеттің атауы, бланкілердің түрі мен нұсқасы, рұқсаттардың саны) енгізу;

• ҚР Көлік министрлігінің АЖ тарапынан тексеру қорытындысы бойынша электрондық ШРБ брондалады;

• алымды төлеу және қол қоюдың қолжетімді әдістерінің бірімен сұрау салуға қол қою.

Қызмет көрсету мерзімі 2 жұмыс күнін құрайды, содан кейін рұқсат тікелей пайдаланушының elicense.kz порталындағы Жеке кабинетіне түседі. Бланк қолданысының мерзімі жеке кабинетке хабарлама түскен сәттен бастап 30 күнді құрайды. Қызметтің құны – бір бланк үшін 1 АЕК.

Функционал ҚР Жасанды интеллект және цифрлық даму министрлігінің Мемлекеттік қызметтер комитеті, «Национальные информационные технологии» АҚ және ҚР Көлік министрлігінің бірлескен жұмысының арқасында жүзеге асырылды.

Бұған дейін Қазақстан мен Қытай ШРБ алмасу үшін сандық квоталар белгілемейтіні хабарланған болатын. Қазақстан мен Қытай сандық квоталар белгілемей, шетелдік рұқсат бланкілерімен алмасудың лимитсіз форматына көшеді. Уағдаластықтар Бейжіңде өткен Халықаралық автомобиль тасымалдары жөніндегі Қытай-Қазақстан бірлескен комитетінің отырысында қол жеткізілді.

Қазақстанның отандық тасымалдаушылары 42 мемлекетпен үкіметаралық келісімдер бойынша халықаралық жүк тасымалын жүзеге асырады. 2025 жылы 506 мың рұқсат бланкісі алмасылды, ал 2026 жылға 40 елмен 150 мың дана көлемінде алдын ала квота келісілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз