• Басты бет
• Технологии
• Қазақстанда барит кендерін өңдеудің инновациялық технологиясы таныстырылды

Қазақстанда барит кендерін өңдеудің инновациялық технологиясы таныстырылды

Жаңа технология қалдықтан жоғары сапалы өнім алуға мүмкіндік береді

Қазақстанда барит кендерін кешенді өңдеудің инновациялық технологиясы әзірленді. Бұл технология құнды компоненттерді алу деңгейін арттыруға және экологиялық жүктемені төмендетуге бағытталған, деп хабарлайды Kapital.kz іскерлік ақпарат орталығы ҚР Өнеркәсіп және құрылыс министрлігіне сілтеме жасап.

Инновациялық технология министрлік қаржыландыратын ғылыми-техникалық бағдарлама аясында жүзеге асырылды. Ведомство мәліметінше, Қазақстанның тау-кен металлургия кешені кәсіпорындарында құрамында 57–60%-ға дейін барий сульфаты бар барит кендерін байыту қалдықтарының едәуір көлемі жинақталған.

«Жоғары ресурстық әлеуетіне қарамастан, бұл материалдар қазіргі уақытта іс жүзінде өңдеуге тартылмаған. Қолданылып жүрген гравитациялық әдістер баритті 70–75% деңгейінде ғана бөліп алуды қамтамасыз етеді, алайда кондициялық концентрат алуға мүмкіндік бермейді. Бұл технологиялық тұрғыдан толық алынбауын көрсетіп, қалдықтарды өнеркәсіптік пайдалануды шектейді», деп атап өтті министрлікте.

Мәселені зерттеу кезінде қалдықтардың заттық құрамына кешенді талдау жүргізіліп, оған минералогиялық, гранулометриялық және физика-механикалық сипаттамалар енгізілді. Барий сульфатының ірілік кластары бойынша таралу заңдылықтары анықталып, оны тиімді бөліп алуға әсер ететін факторлар белгіленді.

Сондай-ақ ғылыми негізде гравитациялық-флотациялық біріктірілген байыту сызбасы әзірленді. Бұл әдіс Жамбыл облысындағы Чиганак кен орнының барит кендерін гравитациялық байыту қалдықтарынан баритті қосымша бөліп алуды қамтамасыз етеді.

Ғылыми-зерттеу кезінде флотацияға арналған оңтайлы реагенттер анықталып, ұнтақтау және байыту режимдерінің тиімді параметрлері белгіленді. Бұған қоса тұйық циклмен жұмыс істейтін технологиялық схема әзірленді.

«Сынақ нәтижелері бойынша қалдықтардан құрамында барий сульфаты 95,47%-ға дейін жететін, ГОСТ 4682-84 талаптарына сәйкес келетін және мұнай-газ өнеркәсібінде қолдануға жарамды барит концентраты алынды», деп қосты ведомствода.

Әзірленген технология баритті қалдықтардан бөліп алудың толықтығын арттырып, жоғары тазалықтағы өнім алуға мүмкіндік береді. Сонымен қатар техногендік қалдықтардың көлемін азайтады, екінші реттік минералдық ресурстарды шаруашылық айналымға енгізеді және өнеркәсіптік алаңдардағы экологиялық жағдайды жақсартады, деп атап өтті министрлікте.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз