• Басты бет
• Государство
• Президент Қазақстанның биоалуантүрлілікті сақтау тәжірибесімен бөлісті

Президент Қазақстанның биоалуантүрлілікті сақтау тәжірибесімен бөлісті

ҚР-да ілбістің саны екі еседен астам артып, шамамен 190-ға жетті

Биоалуантүрлілікті сақтау Қазақстанның экологиялық саясатының негізгі бағыттарының бірі болып қала береді. Бұл туралы Өңірлік экологиялық саммиттің пленарлық отырысында сөйлеген сөзінде Қасым-Жомарт Тоқаев айтты, деп хабарлайды Ақорданың баспасөз қызметі.

««Биоалуантүрлілікті сақтау – экологиялық саясатымыздың негізгі бағыттарының бірі. Табанды еңбек нәтиже берді. Жойылу қаупі төнген ақбөкендер қайта көбейді. Қазақстандағы қар барысының саны екі есе ұлғайып, 190-ға жетті. Халықаралық серіктестермен бірлесіп, басқа да сирек кездесетін жан-жануарлардың, атап айтқанда, сұңқарлардың, Тұран жолбарысының және Пржевальский жылқысының популяциясын қалпына келтіруге кірістік. Орман алқаптарын ұлғайту Қазақстанның экологиялық күн тәртібіндегі басым міндеттерінің біріне айналды Соңғы бес жылда бір миллион гектардан аса аумаққа 1,5 миллиардтан астам ағаш ектік. Соның ішінде шөлейттену үдерісін бәсеңдету мақсатында өзбек мамандарымен бірге Арал теңізінің табанына сексеуіл отырғыза бастадық», деді Қазақстан Президенті.

Президент Тоқаев Қазақстан барлық серіктестерін халықаралық сирек түрлер мен биоалуантүрлілікті сақтау қорына – ғылыми зерттеулер және экожүйелерді тиімді қорғау саласындағы трансшекаралық ынтымақтастық платформасына қосылуға шақыратынын атап өтті.

Ол тұрақты болашақ туралы ортақ пайым келесі негізгі принциптерге сүйенуі керек екенін қосты: біздің азаматтарымыз бен болашақ ұрпақ алдындағы жауапкершілік; шекаралар мен секторлар шеңберінен шығатын ынтымақтастық; ресурстарға, технологиялар мен мүмкіндіктерге қолжетімділіктегі әділдік; нақты нәтижелер беретін практикалық шаралар; көлеміне немесе даму деңгейіне қарамастан елдер арасындағы ынтымақтастық.

Айта кетейік, Өңірлік экологиялық саммиттің пленарлық отырысында сөйлеген сөзінде мемлекет басшысы БҰҰ-ны реформалау, экологиялық таза энергетикаға көшу туралы айтты, Орталық Азия үшін негізгі экологиялық сын-қатерлерді белгіледі, сондай-ақ Каспий маңы өңірінде қарулы күштерді қолдануға жол берілмеуі және тыйым салынуы тиіс екенін мәлімдеді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз