• Басты бет
• Государство
• Қазақстан мен Моңғолия төте автомагистраль салуды жоспарлап отыр

Қазақстан мен Моңғолия төте автомагистраль салуды жоспарлап отыр

Жобаны пысықтау үшін бірлескен үкіметаралық жұмыс тобы құрылады

Президент Қасым-Жомарт Тоқаев Қазақстан мен Моңғолия транзиттік-көлік саласындағы ынтымақтастықты дамытуға, соның ішінде екі ел арасындағы тікелей қатынасты іске қосу мәселесін пысықтауға ниетті екенін айтты, деп хабарлайды Акорданың баспасөз қызметі.

«Жол екі ел арасындағы өзара байланыс көзі, тығыз қарым-қатынас кепілі екені белгілі. Біз бұл мәселенің аса өзекті екенін жақсы түсініп отырмыз. Сондықтан Хурэлсух мырза екеуіміз Қазақстан мен Моңғолия арасында төте жол ашуға мүдделі екенімізді растадық. Кездесу барысында елдерімізді жалғайтын автокөлік жолын салу жөнінде ортақ келісімге қол жеткіздік. Бұл – әрине, жан-жақты сараптап, мұқият зерделеуді қажет ететін күрделі мәселе. Десек те, ең бастысы, жол құрылысы бойынша мақсатымыз – бір. Сол себепті біз құрметті Президент мырзамен жасалған уағдаластыққа сәйкес алдымен бірлескен Үкіметаралық жұмыс тобын құру туралы шешімге келдік. Аталған жұмыс тобы осы мәселе бойынша барлық түйткілді қарайды, көршілес елдермен келіссөздер жүргізеді және жалпы жобаның уақтылы орындалуын қадағалайды. Алдағы уақытта Қазақстан – Моңғолия автожолы елдеріміздің арасындағы сауда-саттықты арттыруға ерекше серпін беретіні анық. Бұл жолдың игілігін іргелес елдер де көретін болады», деді Қасым-Жомарт Тоқаев.

Бұған дейін Акорда баспасөз қызметі Касым-Жомарт Токаевтың шақыруымен 20-23 сәуір аралығында Қазақстанға Моңғолия Президенті Ухнаагийн Хурэлсух мемлекеттік сапармен келетінін хабарлаған болатын.

Шағын құрамдағы келіссөздерде Касым-Жомарт Токаев Ухнаагийн Хурэлсухтың сапары екі ел арасындағы достық қарым-қатынастардың дамуына жаңа серпін беретініне сенім білдірді.

Содан кейін Қазақстан Президенті мен Моңғолия Президентінің келіссөздері ресми делегация мүшелерінің қатысуымен кеңейтілген құрамда жалғасты. Елдер ынтымақтастық туралы 13 келісімге қол қойып, тауар айналымының көлемін 500 млн долларға дейін жеткізуге уағдаласты.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз