• Басты бет
• Государство
• 2 млрд теңгенің жымқырылуы: Петропавлда өтпежол құрылысы бойынша тергеу басталды

2 млрд теңгенің жымқырылуы: Петропавлда өтпежол құрылысы бойынша тергеу басталды

Қаржылық мониторинг агенттігі күдіктіні қамауға алды

Солтүстік Қазақстан облысында автожол өтпежолын салуға бөлінген бюджет қаражатын жымқыру фактісі бойынша тергеп-тексеру жүргізіп жатыр, деп хабарлайды Kapital.kz іскерлік ақпарат орталығы Қаржылық мониторинг агенттігіне сілтеме жасап.

Агенттік мәліметіне сәйкес, 2023 жылдың тамыз айында Петропавл қаласы әкімдігінің «Тұрғын үй-коммуналдық шаруашылығы, жолаушылар көлігі және автомобиль жолдары бөлімі мен «БУКА» ЖШС арасында жалпы құны 5,4 млрд теңгеге автожол өтпежолын салу туралы келісімшарт жасалған. Шартты орындау барысында мердігер ұйым тарапынан жұмыс кестесінен жүйелі түрде кешігуге жол берілген.

Тергеу мәліметінше, мердігер ұйымның директоры тапсырыс беруші тараптың лауазымды тұлғаларымен сөз байласа отырып, нақты орындалған жұмыс көлемі туралы жалған мәліметтер көрсетілген актілерді рәсімдеуді және қол қоюды ұйымдастырған.

Осы құжаттардың негізінде мердігер ұйымның шотына бюджет қаражаты негізсіз аударылған. Заңсыз әрекеттердің салдарынан мемлекетке 2 млрд теңгеден астам залал келтірілген.

Соттың санкциясымен жалпы құны 270 млн теңгеден асатын 24 автокөлік пен арнайы техникаға тыйым салынды. Ал күдіктіге қатысты қамауда ұстау түріндегі бұлтартпау шарасы қолданылды. Тергеу жалғасып жатыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз