• Басты бет
• Государство
• Астанада Халықаралық авиация университеті пайда болуы мүмкін

Астанада Халықаралық авиация университеті пайда болуы мүмкін

Жоба Kent State University қатысуымен жүзеге асырылады деп жоспарланып отыр

2026 жылы Қазақстанда азаматтық авиацияны дамытудың 2050 жылға дейінгі мастер-жоспарын қабылдау жоспарланып отыр. Құжатта шағын авиацияны дамыту және сала үшін кадрлар даярлау бойынша бөлімдер қарастырылады. Бұл туралы депутаттық сауалға берген жауабында Премьер-министр Олжас Бектенов мәлімдеді, деп хабарлайды Kapital.kz іскерлік ақпарат орталығы.

Ол 2025 жылы Көлік министрлігі Халықаралық азаматтық авиация ұйымымен (ИКАО) мастер-жоспарды бірлесіп әзірлеу туралы меморандумға қол қойғанын еске салды.

«Мастер-жоспарды әзірлеуге авиация саласының барлық субъектілері, соның ішінде әуежайлар мен авиакомпаниялар тартылған. Оны ағымдағы жылы қабылдау жоспарланып отыр. Мастер-жоспардың негізгі міндеті — Қазақстанның азаматтық авиациясын одан әрі дамытудың ұзақ мерзімді басымдықтары мен бағыттарын айқындайтын бірыңғай стратегиялық құжатты қалыптастыру, онда кіші авиацияны дамыту бойынша жеке бөлім қарастырылатын болады», - деп көрсетті Премьер.

Жауапта авиация саласын, соның ішінде шағын авиацияны дамыту мәселелері Көлік-логистикалық әлеуетті дамытудың 2030 жылға дейінгі тұжырымдамасында қарастырылғаны түсіндіріледі.

«Зайсан, Кендерлі және Қатонқарағайда туристік өңірлік әуежайлардың құрылысы, сондай-ақ Арқалықтағы әуежайды қалпына келтіру жұмыстары жүргізілуде, оларды аяқтау ағымдағы жылға жоспарланған. Үржар және Үшарал әуежайларында ұшу-қону жолақтары реконструкцияланды, биыл терминалдарды жаңғырту жоспарланған. Балқаш әуежайы бойынша рульдеу жолы, перрон және терминал реконструкцияланды. Жоғарыда аталған шаралар заманауи инфрақұрылымды қалыптастыруға, кіші авиация әуе кемелерін қабылдау үшін жағдай жасауға, ішкі авиатасымалдар желісін кеңейтуге, өңірлердің туристік әлеуетін нығайтуға бағытталған», - делінген сауалға берілген жауапта.

Өңірлік маршруттық желіні дамыту және көліктік байланысты арттыру үшін бюджет заңнамасына жергілікті атқарушы органдардың қаражаты есебінен авиатасымалдарды субсидиялауды қарастыратын өзгерістер енгізу бойынша жұмыс жүргізіліп жатқаны атап өтіледі.

Сауда және интеграция министрлігі азаматтық жеңіл әуе кемелерінің импортына тарифтік жеңілдіктер беру мәселесіне бастамашы болды. Тиісті ұсыныстар Еуразиялық экономикалық комиссия алаңында қаралуда. Заңнамаға талдау жүргізіліп, «шағын және өте шағын авиацияның тек ел аумағы шегінде коммерциялық әуе тасымалдарына жіберілу мәселелерін реттейтін» жеке ережелер жобасы әзірленді.

Шағын авиация саласында қолжетімді сақтандыру тетіктерін енгізу үшін «Тасымалдаушының жолаушылар алдындағы азаматтық-құқықтық жауапкершілігін міндетті сақтандыру туралы» заңға түзетулер әзірленді, олар әуе кемелерінің жолаушылар сыйымдылығына байланысты сақтандыру сыйлықақыларын саралау есебінен пайдаланушыларға түсетін қаржылық жүктемені азайтуға бағытталған: есептеуді 50-ден 5 жолаушы орнына көшіру қарастырылған.

«Азаматтық авиация академиясының жетекші шетелдік университет Kent State University-мен (АҚШ) стратегиялық серіктестігі орнатылуда, ол академиялық өзара іс-қимылды дамытуды, қос дипломды бағдарламалар құруды және Астанада Халықаралық авиация университетінің жобасын пысықтауды қарастырады», - деп атап өтті Премьер-министр.

Еске сала кетейік, 2025 жылдың ақпанында ИКАО Қазақстанның азаматтық авиация саласын дамытудың 2050 жылға дейінгі стратегиялық мастер-жоспарын әзірлейтіні хабарланған болатын.

2026 жылдың наурызында Азаматтық авиация академиясы мен Kent State University (АҚШ) арасында өзара түсіністік туралы меморандумға қол қойылғаны белгілі болды. Бірінші кезеңде ұшқышсыз авиациялық жүйелерді, әуе қозғалысын ұйымдастыру және қызмет көрсетуді, әуе кемелерін техникалық пайдалануды қоса алғанда, бірлескен білім беру бағдарламаларын пысықтау және іске қосу жоспарлануда.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз