• Басты бет
• Государство
• Жыл соңына дейін Жамбыл облысындағы ірі магистральдық канал пайдалануға беріледі

Жыл соңына дейін Жамбыл облысындағы ірі магистральдық канал пайдалануға беріледі

Бұл 1,4 мың гектар жерді сумен қамтамасыз етуді жақсартуға мүмкіндік береді

Жамбыл облысының Жамбыл ауданында «Исмаил» магистральдық каналын реконструкциялау жұмыстары жүргізіліп жатыр. Нысандағы құрылыс-монтаждау жұмыстарын 2026 жылдың соңына дейін аяқтау жоспарланып отыр деп хабарлайды Kapital.kz іскерлік ақпарат орталығы Су ресурстары және ирригация министрлігінің баспасөз қызметіне сілтеме жасап.

Каналдың ұзындығы 9,2 шақырымды құрайды. Жұмыстар биылғы жылдың қаңтар айында басталды, бүгінгі таңда 2,5 шақырымдық учаскесі реконструкцияланды.

Министрліктің мәліметінше, жобада каналды бетондау, су жіберу қондырғыларын, бөгеу құрылыстарын және нөсер суын ағызу жүйелерін орнату, сондай-ақ гидробекет салу жұмыстары қарастырылған.

«Исмаил» каналы арқылы Аса өзенінің суы Жамбыл ауданының суармалы жерлеріне беріледі. Нысанның өткізу қабілеті — секундына 6 текше метр. Каналды реконструкциялау 1454 гектар жерді сумен қамтамасыз етуді жақсартуға және су шығынын азайтуға мүмкіндік береді.

«Нысанда 35 адам және 19 бірлік техника жұмылдырылған. Құрылыс-монтаждау жұмыстарын ағымдағы жылдың соңына дейін аяқтауды жоспарлап отырмыз. Суару кезеңінде нысандағы жұмыстар жалғаса береді. Аграршыларды сумен қамтамасыз ету үшін уақытша канал салынуда», — деді мердігер ұйымның өкілі Ерлан Оразбаев.

Бұған дейін Түркістан облысында 143 шақырым ирригациялық желіні реконструкциялау басталғаны хабарланған болатын.

Жыл соңына дейін Қазақстанда 6 мыңнан астам ирригациялық каналды цифрландыру жоспарлануда. 2026 жылы Қазақстан Республикасында топтық су құбырларын жаңғырту бойынша 12 жоба іске асырылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз