• Басты бет
• Государство
• Шымкентте алма бақтарына бөлінген субсидияны жымқыру фактісі анықталды

Шымкентте алма бақтарына бөлінген субсидияны жымқыру фактісі анықталды

Тергеу сатып алу рәсімдері бұзылып, жоспарланған жұмыстардың бір бөлігі де орындалмағанын айтты

ҚМА Шымкент қаласы бойынша департаменті интенсивті алма бақтарын құру және дамытуға арналған мемлекеттік бағдарлама аясында бөлінген бюджет қаражатын жымқыру фактісі бойынша тергеуді аяқтады, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.

ҚМА ақпаратына сәйкес, «Интенсивті алма бақтарын дайын күйінде тапсыру» бағдарламасы аясында жобаларды қаржыландыру «Ауыл шаруашылығын қаржылай қолдау қоры» АҚ арқылы жүзеге асырылған. Бағдарламаның мақсаты – дайын инфрақұрылымы бар ауыл шаруашылығы жерлерін кәсіпкерлерлік субъектілеріне лизингке беру болған.

«Тергеу амалдарына сай, Қордың бұрынғы басқарма төрағасы Ж.Д. Омаров байланысы бар тұлғалар мен бақылауындағы ұйымдарда, соның ішінде «Green Mart Kazakhstan» ЖШС-ін тарта отырып, мемлекеттік қаражатты жымқыру схемасын ұйымдастырған», делінген ақпаратта.

Сонымен қатар тауарлар мен жұмыстарды сатып алу белгіленген рәсімдерді бұза отырып негізінен бір көзден алу тәсілімен, бәсекелестік орта қамтамасыз етпей жүргізілгені анықталған. Жабдықтардың, материалдардың және құрылыс-монтаж жұмыстардың құны жасанды түрде өсірілген, ал көзделген жұмыстардың бір бөлігі іс жүзінде орындалмаған. Алайда соған қарамастан, жалған қабылдау-тапсыру актілері рәсімделіп, солардың негізінде бюджет қаражаты аударылғаны белгілі болды.

«Нәтижесінде мемлекетке 430 млн теңгеден астам сомаға залал келтірілген. Қосымша агроөнеркәсіпті мемлекеттік қолдау шеңберінде бөлінген инвестициялық субсидияларды заңсыз алу фактілері де анықталды. Осы мақсатта ауыл шаруашылығы кооперативтері құрылып, оларды арқылы бақтарды дамытуға және жұмсалған шығындарды өтеуге арналған субсидия алуға өтінімдер берілген. Нәтижесінде олардың шоттарына жалпы сомасы 327 млн теңгеден астам бюджет қаражаты аударылған», деп қосты ҚМА-да.

Алайда нақтысында көрсетілген мақсаттарға қаражаттың тек шамамен 20%-ы ғана жұмсалып, қалған бөлігі 250 млн теңгеден астам қаржы сенімді адамдар арқылы қолма-қол ақшаға айналдырылып, мақсатсыз пайдаланылған.

Сот санкциясымен жалпы ауданы 108 гектар болатын құны 1 млрд теңгеден асатын жер участкелеріне тыйым салынды. Ал күдікті қамауға алынып, қылмыстық іс сотқа жолданды.

Бұған қоса, ҚМА аталған факт бойынша қордың бұрынғы басқарушы директоры М.К. Искаков мен «Green Mart Kazakhstan» ЖШС-нің басшысы Р.Б. Сазынбек 4 автокөлік тәркілеумен бірге 8 жылға бас бостандығынан айыру жазасына сотталғанын еске салды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз