- Басты бет
- Государство
- Ақылы жолдарда жүргізушілерді қандай өзгерістер күтіп тұр?
Ақылы жолдарда жүргізушілерді қандай өзгерістер күтіп тұр?
Қазір елде жалпы ұзындығы шамамен 4,9 мың шақырымды құрайтын 26 ақылы учаске бар
Былтыр Қазақстанның ақылы жолдарынан түскен табыс 86 млрд теңгені құрады, деп хабарлайды Kapital.kz іскерлік ақпарат орталығы Көлік министрлігіне сілтеме жасап.
Ведомство мәліметінше, барлық түсімдер тек жолдарды күтіп ұстауға, ағымдағы және орташа жөндеуге, жаңа техника сатып алуға, сондай-ақ ақылы автомобиль жолдарын басқаруға ғана бағытталады.
«Аталған шараларды қаржыландыру қаражаты жалпы салық төлеушілер есебінен емес, автожол инфрақұрылымын тікелей пайдаланушылар есебінен жүзеге асырылады», делінген ақпаратта.
Сондай-ақ 2025 жылы түскен қаржыға 89 трактор сатып алынды, тағы 504 бірлік техниканы жеткізу жоспарланған. Есепті кезеңде 61,4 мың м² аумақта шұңқырлы жөндеу жүргізілді, 19,6 мың км жол белгілері сызылды, 4 мыңнан астам жол белгілері орнатылды және 31,6 мың метр қоршаулар жөнделді.
Ақылы жүйені енгізу саладағы жүйелі өзгерістерге әкелді, деп қосты министрлікте. Негізінен реконструкциядан өткен, жылдамдық, өткізу қабілеті және қызмет көрсету деңгейі бойынша заманауи талаптарға сай келетін жолдар ақылы болады.
«Бұл жылдам жүретін көлік дәліздерін дамытуға және елдің транзиттік әлеуетін арттыруға септігін тигізеді. Сонымен қатар мемлекеттік бюджетке түсетін жүктеме азаяды, бұл бюджет қаражатын жаңа инфрақұрылымдық жобаларды іске асыруға қайта бөлуге мүмкіндік береді, сондай-ақ саланың инвестициялық тартымдылығын арттырады. Бұл ретте Қазақстандағы ақылы автомобиль жолдарындағы тарифтер деңгейі шетелдік елдермен салыстырғанда төмен деңгейде қалып отыр», деп атап өтті министрлікте.
Бұған қоса, жүйені жетілдірудің қосымша элементі ретінде ақауы бар деп танылған учаскелерде төлем алуды тоқтатуды қарастыратын норма енгізілді. Енді белгіленген талаптарға сай еместігі анықталған жағдайда, ақаулар толық жойылғанға дейін жол жүру үшін ақы алынбайды. Бұл оператордың жауапкершілігін арттырады және пайдаланушылар үшін әділ қағида орнатады.
Сонымен қатар пайдаланушылар үшін төлеудің қосымша ыңғайлы және экономикалық тиімді тетіктері қарастырылған. Атап айтқанда, жергілікті автокөліктер үшін ақылы жолдарды жүйелі пайдаланған кезде шығынды айтарлықтай төмендетуге мүмкіндік беретін айлық және жылдық абонементтер бар. Алдын ала төлеу жүйесі посттөлемге қарағанда төмен тарифтерді көздейді. Халық үшін жол ақысын төлеу мерзімі бір айға дейін ұзартылды, бұл жүргізушілерге есептеулерді уақытылы өтеуге көбірек уақыт береді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
