Салық органдары Қазақстанда 23 маркетплейсті бақылауға алды
Маркетплейстердің салық органдарына деректер ұсынуы азаматтар мен бизнес үшін нені білдіреді
Қазақстанның Мемлекеттік кірістер комитеті 23 маркетплейсті бақылауға алды, енді салықшылар әрбір сатылымды көріп отыр, деп хабарлайды Kapital.kz іскерлік ақпарат орталығы.
Мемлекеттік кірістер комитеті елде электрондық сауда саласына бақылау күшейтіліп жатқанын хабарлады. Ведомство Салық кодексіне сәйкес интернет-платформалар (маркетплейстер - ред) иелері ай сайын есепті кезеңнен кейінгі айдың 5-інен кешіктірмей мемлекеттік кірістер органдарына сатылған тауарлар, көрсетілген қызметтер, сондай-ақ Қазақстан Республикасының резиденті болып табылатын жеке тұлғаларға жүзеге асырылған төлемдер туралы мәліметтерді ұсынуға міндетті екенін еске салды.
Қазіргі күні 23 маркетплейс мемлекеттік кірістер органдарына қажетті мәліметтерді ұсынған. Олардың қатарында сатушылар туралы, сатылған тауарлар мен көрсетілген қызметтер туралы, сондай-ақ жүзеге асырылған төлемдер туралы ақпарат бар.
«Мұндай мәліметтерді ұсыну онлайн-сауданың ашықтығын арттыруға, көлеңкелі айналымды қысқартуға және бюджетке салықтардың толық түсуін қамтамасыз етуге мүмкіндік береді. Салық төлеушілер салықтық есептілікті тапсырғаннан кейін мемлекеттік кірістер органдары камералдық бақылау жүргізіп, маркетплейстердің деректерін декларациялармен салыстырады», деді комитетте.
Ведомство салыстыру кезінде сәйкессіздіктер анықтаған жағдайда салық төлеушіге бұзушылықтарды жою қажеттігі туралы хабарлама жібеді.
Осылайша, жаңа шаралар электрондық саудаға қатысушылардың барлығы үшін әділ және тең жағдайлар жасап, сондай-ақ онлайн-нарыққа деген сенімді арттырады деп атап өтті комитетте.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
