Қазақстанда аквашаруашылыққа 60 млрд теңге инвестиция тартылады

Қазақстанда аквашаруашылық саласына бағытталған инвестициялық жобалардың жиынтық құны 60 млрд теңгені құрайды. Бұл туралы АШМ Балық шаруашылығы комитетінің төрағасы Серік Сермағамбетов мәлімдеді, Kapital.kz іскерлік ақпарат орталығы.

Оның айтуынша, жоспарланған жобаларды іске асыру агроөнеркәсіп кешенінің өндірістік әлеуетін айтарлықтай арттыруға мүмкіндік береді. Жаңа нысандар пайдалануға берілгеннен кейін жыл сайын 30 мың тонна жем және 14 мың тонна балық өндіріледі деп күтіледі.

Комитет төрағасы саланың соңғы жылдары қарқынды дамып келе жатқанын атап өтті. 2021 жылы басталған балық шаруашылығын дамыту бағдарламасының нәтижесінде шаруашылықтар саны 2,5 есеге өсіп, 700-ге жеткен. Ал өндіріс көлемі 9 мың тоннадан 26 мың тоннаға дейін артты.

Сондай-ақ жеке инвестициялар көлемі де ұлғайған. 2021–2025 жылдары жалпы құны шамамен 26 млрд теңгені құрайтын 95 жоба жүзеге асырылды. Бұл жобалардың өндірістік қуаты жылына 20 мың тоннадан асады. Нәтижесінде шамамен 1200 жаңа жұмыс орны ашылған.

Саланың негізгі даму драйвері — «Аквашаруашылық туралы» заң аясындағы мемлекеттік қолдау тетіктері. Атап айтқанда жем сатып алу шығындарының 30%-ы өтеледі; балық шабағын, дәрі-дәрмек пен аналық қорды сатып алуға жұмсалған шығындардың 50%-ы субсидияланады; инвестициялық жобалар бойынша шығындардың 25%-ы өтеледі; ұңғымалар бұрғылауға кеткен шығындардың 50%-ы жабылады.

Бұдан бөлек, 2024–2025 жылдары саладағы 10 кәсіпкерлік нысан жалпы сомасы 5,7 млрд теңге көлемінде жеңілдетілген несие алған.

«Биыл министрлік аквашаруашылық субъектілеріне айналым қаражатын толықтыру үшін жылдық 5 пайызбен 18 айға дейін, ал инвестициялық жобалар үшін 6 пайызбен несие беру бағдарламасын енгізуде. Жақын уақытта бұл бағдарлама іске қосылады», — деді Серік Сермағамбетов Шымкентте өткен «AUYL FEST. Балық шаруашылығы» халықаралық фестивалінде.

Айта кетейік, аталған іс-шараға Норвегия, Жапония, АҚШ, Қытай және басқа да елдердің сарапшылары қатысты. Қатысушылар саланы 2030 жылға дейін дамыту, жаңа технологияларды енгізу және инвестиция тарту мәселелерін талқылады.