Eni-дің еншілес компаниясы Ақтөбе облысында жаңа жел электр станциясын салады
Оның қуаттылығы 100 МВт құрайды
Италиялық Eni S.p.A. еншілес компаниясы — «Plenitude Kazakhstan» ЖШС Ақтөбе облысында қуаттылығы 100 МВт жел электр станциясын салады. Жобаны соңғы инвестициялық шешім қабылданғаннан кейін 2026–2028 жылдары іске асыру жоспарланып отыр. Бұл туралы өңір әкімі Асхат Шахаровтың «Plenitude Kazakhstan» бас директоры Федерико Пульеземен кездесуінде белгілі болды, деп хабарлайды Kapital.kz іскерлік ақпарат орталығының тілшісі әкімдіктің баспасөз қызметіне сілтеме жасап.
«Ақтөбе облысы үшін бұл жобаның Қазақстан мен Италияның «жасыл» энергетика саласындағы ынтымақтастығының сәтті үлгісі болуы ерекше маңызды. Оның іске асырылуы жаңартылатын энергия көздерін дамыту, заманауи технологияларды енгізу және тұрақты экономикалық өсімді қамтамасыз ету жөніндегі стратегиялық міндеттерге сай келеді», – деп атап өтті облыс әкімі.
2026 жылғы мамырда «Plenitude Kazakhstan» энергетика министрлігі ұйымдастырған аукцион қорытындысы бойынша қуаттылығы 100 МВт жел электр станциясын салу құқығына ие болды. Нысан пайдалануға берілгеннен кейін электр энергиясын өндіру көлемі жылына 400 ГВт*сағ деңгейінде жоспарланып отыр.
Асхат Шахаров компанияның Бадамша ауылында іске асырған жел электр станциясы жобасы Eni компаниясының жел энергетикасына салған алғашқы ірі инвестициясы және компанияның Қазақстандағы жаңартылатын энергия көздері саласындағы алғашқы жобасы болғанын атап өтті. 2025 жылдың қорытындысы бойынша Ақтөбе облысының Италиямен тауар айналымы 182,8 млн долларды құрады. Бұл ретте экспорт көлемі 165,1 млн долларға жетсе, импорт – 17,7 млн долларды құрады.
Бұған дейін Жетісу облысында қуаттылығы 1 ГВт жел электр станциясы салынатыны белгілі болған. Қарағанды облысының Осакаров ауданында қуаттылығы 500 МВт жел электр станциясының құрылысы басталды. Жобаға 600 млн доллардан астам инвестиция салынуда. China Energy ҚР-дағы күн және жел электр станцияларының құрылысына 1 млрд доллар инвестициялайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
