Астанада қоқыс өртеу зауытының құрылысы басталды
Зауыт қоқыс өртеумен қатар электр энергиясын өндірумен айналысады
Астанада электр энергиясын өндіретін қоқыс жағу зауытын салу бойынша ауқымды жоба жүзеге асырыла бастады. Астана әкімі Жеңіс Қасымбек Shenzhen Energy Group Co. Ltd компаниясының өкілдерімен бірлесіп, «Астана энергиясы» экопаркі» жобасының басталуына ресми түрде старт берді, деп хабарлайды Kapital.kz іскерлік ақпарат орталығы.
Елорда әкімінің сөзінше, кешенде қатты тұрмыстық қалдықтар жағылып, электр энергиясы өндірілетін болады.
«Жоба құрылыс пен пайдалану саласындағы ең жоғары стандарттарға сай іске асырылып, Орталық Азиядағы ең озық әрі экологиялық талаптары қатаң энергетикалық экопарктердің бірін ашуды көздейді», деп жазды ол әлеуметтік желіде.
Зауыт құрылысы 36 айда бітеді деп белгіленген. Пайдалануға берілгеннен кейін ондағы қатты тұрмыстық қалдықтарды өңдеудің жылдық қуаты 550 мың тоннаға жетеді.
«Бұл қалалық экологиялық ортаны едәуір жақсарта отырып, қалдықтарды зиянсыз, қысқартылған және ресурс үнемдеу арқылы қайта өңдеуді толығымен іске асыруға мүмкіндік береді», деп қосты Қасымбек.
Сонымен қатар зауытта электр энергиясының орташа жылдық өндірісі шамамен 330 млн кВт·сағ құрайды. Ал нысанның өз қажеттіліктерін қамтамасыз етумен қатар, жыл сайын шамамен 280 млн кВт·сағ таза электр энергиясы қаланың энергетикалық жүйесіне тұрақты жеткізу жоспарланған.
Бұған қоса жоба аясында кемінде 90 тұрақты жұмыс орнын ашып, қызметкерлерді кезең-кезеңімен шетелде кәсіби-техникалық оқытуды ұйымдастыру көзделіп отыр.
Айта кетейік, қазіргі уақытта қала аумағында пайда болатын барлық қоқыс «Astana Recycling Plant» қалдықтарды өңдеу зауытына шығарылады. Онда олар сұрыптаудан өткеннен кейін қалдықтар полигонына тасымалданады. Елордада бір ғана рұқсат етілген қоқыс полигоны бар, ол 2 ұяшықтан тұрады. Бірінші ұяшық консервацияланған, ал екінші ұяшық 2018 жылдан бері пайдаланылып келеді және 2,2 млн тонна ТҚҚ-мен толтырылған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
