Ақтөбе облысында көмірсутек барлауына 3,5 млрд теңге инвестиция салынады
Энергетика министрлігі, QazaqGaz және СНПС-Ақтөбемұнайгаз келісімшартқа қол қойды
Энергетика министрлігі, QazaqGaz және СНПС-Ақтөбемұнайгаз Ақтөбе облысындағы «Северный-1» жер қойнауы учаскесінде көмірсутектерді барлау және өндіру бойынша келісімшартқа қол қойды, деп хабарлайды Kapital.kz іскерлік ақпарат орталығы Энергетика министрлігінің баспасөз қызметіне сілтеме жасап.
Құжатқа Энергетика вице-министрі Ерлан Ақбаров, «QazaqGaz» басқарма төрағасының орынбасары Асылжан Даулетов және «СНПС-Ақтөбемұнайгаз» бас директоры Жу Шитао қол қойған.
Келісімшарт аясында 2D және 3D сейсмикалық барлау жұмыстарын жүргізу, сондай-ақ тәуелсіз және тәуелді іздеу ұңғымаларын бұрғылау жоспарланып отыр. Геологиялық барлау жұмыстарына салынатын жалпы инвестиция көлемі 3,5 млрд теңгені құрайды.
Министрлік мәліметінше, құжат геологиялық барлау жұмыстарын кешенді түрде жүргізуге мүмкіндік береді. «Северный-1» учаскесі көмірсутек қорларының жаңа көздерін анықтау тұрғысынан жоғары әлеуетке ие.
Жоба Қазақстан мен Қытай компаниялары арасындағы экономикалық өзара іс-қимылдың жүйелі дамып келе жатқанын көрсетеді. Сондай-ақ келісім тараптардың екіжақты ынтымақтастықты одан әрі нығайтуға және кеңейтуге мүдделі екенін растайды, деді министрлікте.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
