Саранда шағын индустриялық аймақ салынуда

Жақын уақытта оның аумағында шағын және орта бизнес өндірістерін орналастыруға арналған шағын индустриялық аймақ ашылады, деп хабарлайды Kapital.kz іскерлік ақпарат орталығы.

Облыс әкімі Ермағанбет Бөлекпаев Saran индустриялық аймағына барып, жаңа жобалардың іске асырылу барысымен танысты.

Қазір шағын индустриялық аймақтың құрылысы қарқынды жүргізілуде. Бұл дайын коммуналдық инфрақұрылымы бар заманауи өндірістік кешен болмақ. Нысанның жалпы аумағы — 30 мың шаршы метрді құрайды.

Жоба өнеркәсіпті дамытуға және шағын әрі орта бизнесті қолдауға бағытталған: кәсіпкерлер бастапқы шығындарын азайтып, өндірісті жедел іске қоса алады.

«Мұнда жүк көліктері мен арнайы техникалар өндірісі ұйымдастырылады — бастапқыда құрастыру жүргізіліп, кейін кезең-кезеңімен терең локализацияға көшу жоспарланған. Сонымен қатар, тағы бір жоба — Qarmet компаниясының қажеттіліктеріне арналған ірі өнеркәсіптік ыдыстар өндірісі. Бұл импортты алмастыру бағытындағы маңызды қадам», – деп атап өтті Ермағанбет Бөлекпаев.

Өңінде өзге де инвестициялық жобалардың жүзеге асырылып жатыр. Атап айтқанда, жылуоқшаулағыш материалдар шығаратын зауыт іске қосылуға дайындалуда — алаңда жабдықтарды монтаждау жұмыстары жүргізілуде. Кәсіпорында шамамен 200 жаңа жұмыс орны ашылады, ал өндіріс айналасындағы сервистік ұйымдарда тағы мыңнан астам адам жұмыспен қамтылады.

Сонымен қатар HOWO брендімен жүк көліктерін шығару жобасы басталмақ. Жобаны іске асыру 24 млрд теңге инвестиция тартуға және мыңға жуық жаңа жұмыс орнын құруға мүмкіндік береді. Зауыт толық қуатына шыққанда жылына 10 мыңға дейін техника өндіретін болады.

Бұған қоса құбыр өндірісін дамыту да жалғасып жатыр. Зауыттың жобалық қуаты жылына 300 мың тоннаға дейін өнім шығаруға мүмкіндік береді. Қазіргі уақытта шағын диаметрлі құбырлар өндірісі жолға қойылған, ал жақын арада диаметрі 630 мм-ге дейінгі ірі құбырларды игеру жоспарланып отыр. Дайын өнімдер тұрғын үй-коммуналдық шаруашылық пен құрылыс салаларында қолданылады деп жоспарланып отыр.