Жылдамдықты лазермен өлшеу және газ баллондарды тексеру: Жүргізушілерді не күтіп тұр?
Жыл басынан бері Қазақстанда 5,5 мың жүргізуші мас күйде ұсталған
Қазақстанда жол қауіпсіздігін күшейту үшін жаңа технологиялар енгізіліп, бақылау талаптары қатаңдатылады. Бұл туралы Премьер-министр Олжас Бектенов төрағалығымен өткен құқық бұзушылық профилактикасы жөніндегі ведомствоаралық комиссия отырысында айтылды, деп хабарлайды Kapital.kz іскерлік ақпарат орталығы
Ішкі істер министрі Ержан Саденов мәліметінше, жыл сайын елде жол апаттарынан шамамен 40 мың адам жарақат алады, ал 2,5 мыңға жуық адам қаза табады. Соған қарамастан, 2025 жылы өлім-жітім 10%-ға, ал 2026 жылдың басынан бері тағы 4%-ға төмендеген.
Министрдің айтуынша, апаттардың негізгі себептері — жүргізушілер тәртібінің төмендігі, жол инфрақұрылымының сапасы және көліктердің техникалық жағдайы.
«Орташа жылдамдықты қадағалау жүйелерімен қамтуда проблема бар: жабдықтар жеткіліксіз. ЖКО-лар үлесі әсіресе елді мекендерде жоғары болып қалуда, олар барлық апаттардың 84%-ын құрайды. Жүргізушілердің жеке тәртібі нашар – ЖКО-лардың 90%-ы солардың кінәсінен болатыны атап өтілді. Жыл басынан бері 3 млн-нан астам Жол қозғаласы ережесін (ЖҚЕ) бұзу дерегі анықталды, 5,5 мың жүргізуші мас күйде ұсталды» делінген Үкімет таратқан ақпаратта.
Осыған байланысты елде цифрлық бақылау жүйелері кеңейтіліп жатыр. Қазір республика жолдарында 30 мыңға жуық камера жұмыс істейді, олар барлық құқықбұзушылықтардың 60%-дан астамын тіркейді. Сонымен қатар орташа жылдамдықты бақылау жүйелері енгізіліп, «жасырын» патрульдеу тәжірибесі дамытылып жатыр.
Жаңа қабылданған шаралардың бірі — трассаларда лазерлік технологияларды пайдалану болды. Қала сыртындағы жолдарда көріну деңгейін арттыру үшін арнайы лазерлік жүйелер енгізіліп жатыр. Бұл жүйелер түнгі уақытта және қолайсыз ауа райында қауіпсіздікті күшейтуге бағытталған. Қазірдің өзінде мұндай технологиялар 11 өңірдегі 22 учаскеде іске қосылған.
Бұдан бөлек, көліктердің техникалық жағдайына қойылатын талаптар күшейтіледі. ІІМ газ баллон жабдығы орнатылған көліктерді тексеруді қатаңдатуды ұсынып отыр. Сондай-ақ жүк және жолаушылар тасымалдайтын көліктерге жарық шағылыстыратын белгілерсіз техникалық байқаудан өтуге тыйым салу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
