Алматыда Қазақтың спорт және туризм академиясында жақын болашақта ауыр атлетикадан екі дүркін Олимпиада чемпионы, төрт дүркін Әлем чемпионы Илья Ильин атындағы академия ашылады. Бұл туралы Kapital.kz іскерлік порталына аталмыш жоғары оқу орнының және Қазақстанның ұлттық Студенттік спорт федерациясының президенті Қайрат Зәкіриянов мәлімдеді.
«Илья, құдай қаласа, биыл өзінің докторлық диссертациясын қорғайды. Мен Ильямен келіскенмін. Оған: «Илья, сенің ауыр атлетикада жеткен жетістіктерің, алған баға жетпес тәжірибелерің қолданыссыз қалмауы керек. Сен біздің дарынды жасөспірімдермен жұмыс істеуің қажет. Сондықтан осы академияда сенің атыңда академия ашайық» - дегенмін. Ол қуанып: «Мақұл» - деді. Соны қазір қалай, қай түрде ашсақ екен деп ойлап жатқан жайымыз бар» - деді Қ. Зәкіриянов.
Оның айтуынша, Илья Ильин өзінің докторлық диссертациясын биыл осы академия қабырғасында қорғайды.
«Илья Ильиннің ҚР Білім және ғылым және ҚР Мәдениет және спорт министрлерінің атына жазған хаты өз нәтижесін берді. Жақында ҚР Білім және ғылым министрлігінде отырыс өтті. Онда Қазақтың спорт және туризм академиясында докторлық диссертациялық кеңес ашу туралы шешім қабылданды» - деді Қ. Зәкіриянов.
Естеріңізде болса, Илья Ильин 2014 жылдың 25 қарашасында ҚР Білім және ғылым министрі Аслан Сәрінжіпов пен Мәдениет және спорт министрі Арыстанбек Мұхамедиұлының атына Ашық хат жолдаған болатын.
Өз хатында Илья Ильин Қазақтың спорт және туризм академиясында диссертациялық кеңес ашуды өтінген еді. Ол өзі осы жоғары оқу орнының докторанты (биыл докторлық диссертациясын қорғайды). Ал бұл академияда диссертациялық кеңес жоқ. Сайып келгенде Олимпиада чемпионы диссертациясын Алматыдағы Абай атындағы Қазақ Ұлттық Педагогикалық Университетінде қорғауына тура келеді. Өйткені, Ильяның айтуынша «Абай атындағы ҚазҰПУ-да 6D010000-Білім беру(гуманитарлық ғылымдар) мамандығы бойынша диссертациялық кеңес жұмыс істейді.
«Оған белгісіз себептермен, «Дене шынықтыру және спорт» мамандығы да енгізілген. Ал шын мәнінде оның бұл кеңеске ешқандай қатысы жоқ. Оның үстіне, диссертациялық кеңестің құрамына негізінен жалпы педагогика
саласының ғалымдары енеді. Олар әрине, спорт теориясы мен практикасына арналған диссертациялық жұмыстардың жаңашылдығы мен маңыздылық деңгейін әділ бағалай алмайды» - деген болатын өз хатында И. Ильин.
Ол Ашық хатының соңында Қазақтың спорт және туризм академиясында диссертациялық кеңес құрудың маңыздылығына атап көрсеткен.
«Қазақтың спорт және туризм академиясы жанынан диссертациялық кеңес ашу - спорт салалары бойынша жаңа технологиялар мен жаттығу үдерістерін дамытуға бағытталған әдістемелерді жетілдіруге септігін тигізеді. Ал бұл, өз кезегінде әсіресе 2016 жылы Рио-де Жанейро қаласында өтетін жазғы Олимпиада ойындары мен 2017 жылы Алматы қаласында өтетін Бүкіләлемдік қысқы Универсиада ойындары қарсаңында ерекше маңызға ие» - деп жазған И. Ильин.
Енді міне, Қайрат Зәкірияновтың айтуынша алдағы бір-екі айдың ішінде диссертациялық кеіңес өз жұмысын бастайды.
