Қазақстан 2027 жылы үш жер серігін ұшыруды жоспарлап отыр

Қазақстан 2027 жылы Жерді қашықтан зондтау (ЖҚЗ) бойынша үш ғарыш аппаратын ұшыруды жоспарлап отыр. Ал 2030 жылға қарай алты жер серігінен тұратын орбиталық топтама қалыптастыру көзделуде. Бұл туралы Қазақстан Ғарыш Сапары ұлттық компаниясының басқарма төрағасы Қайыржан Қожаев мәлім етті, деп жазады Интерфакс-Қазақстан.

Оның айтуынша, қазіргі уақытта аппараттарды біріктіру және құрастыру жұмыстары жүргізілуде, барлық жүйелер сатып алынған. Қосалқы жүйелер тексеріліп, бағдарламалық қамтамасыз етуі жаңартылып жатыр. Сынақтар биылғы жылдың ортасынан басталады.

Жаңа жер серіктері бұрын еуропалық серіктестермен бірлесіп жасалған қолданыстағы аппараттардың орнын басады. Ұшыру SpaceX зымыран-тасығышы арқылы жүзеге асырылады. Бұл шешім кейбір еуропалық құрамдас бөліктерді пайдалануға қатысты келісімшарттық шектеулермен байланысты болып отыр.

«Болашақта, 2029-2030 жылдары тағы үш ғарыш аппаратын ұшырып, топтаманы алты спутникке дейін кеңейтуді жоспарлап отырмыз», – деді Қайыржан Қожаев.

Жаңа аппараттардың түсірілім айқындығын 0,5 метрге дейін арттыру көзделіп отыр. Ұшырулар Байқоңыр ғарыш айлағы арқылы жүзеге асырылуы мүмкін.

Қазіргі уақытта орбитада Қазақстанның бес ғарыш аппараты бар, оның ішінде үш ЖҚЗ спутнигі және екі байланыс спутнигі жұмыс істеп тұр. KazEOSat-2 халықаралық талаптарға сәйкес ғарыш қоқысын азайту мақсатында орбитадан шығару рәсімінен өтуде.

Қайыржан Қожаев атап өткендей, алғашқы ЖҚЗ спутниктері 2014 жылы ұшырылған және әлі күнге дейін кепілдік мерзімінен тыс жұмыс істеп келеді.

Бұған дейін Қазақстан 2027 жылы орташа айқындығы бар KazEOSat-MR спутнигін орбитаға шығаруды жоспарлап отырғаны хабарланған еді. Бұл жоба KazEOSat-2 аппаратын алмастыруға бағытталған.

«KazEOSat-MR» спутниктер тобын құру жобасын отандық мамандар Астана қаласындағы ғарыш аппараттарын құрастыру-сынақ кешенінде жүзеге асырып жатыр.

Сонымен қатар Қазақстанда Жердің гравитациялық өрісін өлшейтін спутник жасау жұмыстары да жүргізілуде.