Грузиядан «Транстелеком» ісі бойынша күдікті экстрадицияланды
Келтірілген залал көлемі 4 млрд теңгеден асады
Грузия Қазақстанға «Транстелеком» ісі бойынша аса ірі көлемдегі ұрлық жасады деген күдікке ілінген азаматты экстрадициялады, деп хабарлайды Kapital.kz іскерлік ақпарат орталығы Бас прокуратураның баспасөз қызметіне сілтеме жасап.
«Бас прокуратура мен Қаржылық мониторинг агенттігінің қызметкерлері, сондай-ақ Қазақстанның Грузиядағы елшілігінің қолдауымен аталған елден Қазақстан азаматы экстрадицияланды. Ол сеніп тапсырылған қаржыны аса ірі көлемде ысырап ету арқылы жымқырды деген күдікпен қылмыстық жауапкершілікке тартылмақ», – делінген хабарламада.
Тергеу мәліметінше, күдікті компания басшысы бола отырып, алдын ала сөз байласқан топ құрамында әрекет етіп, ақша жымқыру мақсатында мемлекеттік сатып алу нормаларын сақтамай, спутниктік және телекоммуникациялық жабдықтарды жалға алу бойынша заңсыз келісімшарт жасаған. Соның салдарынан мемлекетке «Транстелеком» АҚ арқылы 4 млрд теңгеден астам залал келтірілген.
Қылмыс жасалғаннан кейін күдікті бой тасалап, халықаралық іздеуге жарияланған. Биыл наурыз айында ол Грузия аумағында ұсталып, Қазақстан Бас прокуратурасының сұрауы бойынша елге экстрадицияланды.
Қазіргі уақытта күдікті тергеу изоляторына қамалды. Оған тағылған айып бойынша 12 жылға дейін бас бостандығынан айыру және мүлкін тәркілеу жазасы қарастырылған.
Бұған дейін Түркия Қазақстанға зергерлік бұйымдарға қатысты алаяқтық ісі бойынша күдіктіні экстрадициялаған. Сондай-ақ Грузия қаржы пирамидасы бөлімшесін басқарды деген күдікке ілінген азаматты Қазақстанға тапсырған. Ал Сауд Арабиясынан алаяқтыққа күдікті тұлға экстрадицияланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
