Philips ұлттық медициналық деректер архивін құру жобасына қатысады

Philips денсаулық сақтау саласындағы жасанды интеллект бағытындағы ынтымақтастықты кеңейтуге дайын екенін растады. Нидерланд компаниясы ұлттық медициналық кескіндер архивін (VNA) құру жобасына қатысуға ниетті, деп хабарлайды Kapital.kz іскерлік ақпарат орталығы жасанды интеллект және цифрлық даму министрлігінің баспасөз қызметіне сілтеме жасап.

Ведомство мәліметінше, жасанды интеллект және цифрлық даму министрлігі мен денсаулық сақтау министрлігі басшылығы Royal Philips компаниясының делегациясымен кездесу өткізді. Келіссөздер барысында ұлттық медициналық кескіндер архивін (VNA) құру жобасының қазіргі жай-күйі мен оны іске асыру перспективалары, сондай-ақ денсаулық сақтауда жасанды интеллектті қолдану бағытындағы ынтымақтастықты кеңейту мәселелері талқыланды.

Министрлікте атап өткендей, VNA (Vendor-Neutral Archive) жобасы елдегі барлық медициналық ұйымдардағы кескіндерді (КТ, МРТ, УДЗ) бірыңғай жүйеге біріктіруге бағытталған. Бұл деректерді сенімді сақтауды қамтамасыз етіп қана қоймай, отандық жасанды интеллект стартаптарын оқытуға арналған ауқымды база қалыптастырып, диагностика дәлдігін арттыруға мүмкіндік береді.

Philips өз технологияларын ұсынуға және қаржыландырудың түрлі модельдерін, соның ішінде Philips Capital арқылы қатысу мен халықаралық қорларды тарту мүмкіндігін қарастыруға дайын екенін мәлімдеді.

«Ұлттық медициналық деректер архивін құру – бұл тек ақпаратты сақтау мәселесі емес, цифрлық медицинада сапалы серпіліс жасауға негіз болатын жоба. Жиналған құрылымдалған деректер қоры дәрігерлерге диагнозды жылдам әрі дәл қоюға көмектесетін отандық жасанды интеллект шешімдерін дамытуға мүмкіндік береді. Біз Philips секілді әлемдік көшбасшылардың тек технология жеткізіп қана қоймай, экожүйемізге кірігіп, жергілікті стартаптарды қолдауға және жаңа Халықаралық жасанды интеллект орталығының жұмысына қатысуға ниет білдіруін құптаймыз», – деді вице-премьер – жасанды интеллект және цифрлық даму министрі Жаслан Мадиев.

Кездесу барысында Philips делегациясымен Астана қаласындағы Халықаралық жасанды интеллект орталығы базасында зертхана немесе R&D орталық ашу мүмкіндігі де талқыланды. Бұл алаң білім беру бағдарламаларын, стартаптарды акселерациялауды және ірі технологиялық компаниялардың зертханаларын біріктіретін бірегей хабқа айналмақ.

Тараптар жобаны пысықтауды жалғастырып, жақын арада келісімдерді рәсімдеу кезеңіне өтетін болды.