Қазақстанда көмір генерациясын дамыту ұлттық жобасы аясында қай ЖЭО-лар жаңғыртылады

Қазақстанда көмір генерациясын дамыту жөніндегі ұлттық жоба жоспарына 11 жұмыс істеп тұрған электр станциясын жаңғырту енгізілген, деп хабарлайды Kapital.kz іскерлік ақпарат орталығы энергетика министрлігінің баспасөз қызметіне сілтеме жасап.

«Көмір генерациясын дамыту жөніндегі жаңа ұлттық жоба аясында ҚР энергетика министрлігі үшін басым бағыттардың бірі қолданыстағы энергия көздерін техникалық қайта жарақтандыру және жаңғырту болады. 11 жұмыс істеп тұрған электр станциясында жабдықтарды жаңғырту, реконструкциялау және кеңейту жобалары іске асырылады», – делінген ведомство ақпаратында.

Келесі іс-шаралар жоспарланған:

* Ақсу ГРЭС-індегі №7 энергоблокты жаңғырту (325 МВт);

* Екібастұз ГРЭС-2-де №3 және №4 энергоблоктарды салу (1 100 МВт);

* Қарағанды ЖЭО-сын кеңейту (140 МВт);

* Өскемен ЖЭО-сын кеңейту (100 МВт);

* Топар ГРЭС-ін жаңғырту (250 МВт);

* Шахтинск ЖЭО-сын кеңейту (130 МВт);

* БТЭЦ және ЖТЭЦ-те турбоагрегат енгізу (50 МВт);

* Согра ЖЭО-сын кеңейту (50 МВт);

* «Qarmet» АҚ-ның ЖЭО-2-сін кеңейту (230 МВт);

* Степногорск ЖЭО-сын жаңғырту (30 МВт).

Аталған жобаларды іске асыру нәтижесінде генерация қуаты шамамен 2,5 ГВт-қа ұлғайып, электр станцияларының жұмыс тиімділігі артады және олардың қауіпсіз пайдалану мерзімі ұзарады деп күтілуде.

Бұған дейін Қазақстандағы ЖЭО-лардың жалпы тозу деңгейі 59%-ды құрайтыны хабарланған болатын.

Биыл наурыз айында көмір генерациясын дамыту жөніндегі ұлттық жоба бекітілді. Жаңа станциялар салу және қолданыстағыларды жаңғырту үшін 7,5 трлн теңге инвестиция қажет.

Айта кетейік, Ұлттық құрылтайдың V отырысында Қасым-Жомарт Тоқаев Қазақстанда көмір қоры шамамен 33 млрд тонна екенін атап өтіп, көмір генерациясын дамыту жұмысына ұлттық жоба мәртебесін беруді тапсырған болатын.