Қазақстанда смартфон арзандап, сымсыз құлаққаптар қымбаттады

2026 жылғы наурызда Қазақстанда инфляция қарқыны баяулап, айлық көрсеткіш 0,6% болды. Бұл ақпанмен салыстырғанда 0,5 пайыздық тармаққа төмен, деп хабарлайды Kapital.kz іскерлік ақпарат орталығы Ұлттық статистика бюросына сілтеме жасап.

Баға өсімінің бәсеңдеуі барлық негізгі санаттарда тіркелді. Ресми статистикаға сәйкес, бір ай ішінде азық-түлік бағасы 0,7%, ақылы қызметтер – 0,6%, ал азық-түлікке жатпайтын тауарлар 0,5% қымбаттады.

Азық-түлік сегментінде бағаның төмендеуі байқалған тауарлар қатарында қияр (–22,6%), пияз (–10,9%) және қызанақ (–2,6%) бар. Ал тәтті бұрыш 10,7%, банан 5,4% қымбаттады.

Азық-түлікке жатпайтын тауарлар ішінде баға динамикасы әркелкі болды. Атап айтқанда электроника мен тұрмыстық техника сегментіндегі бағаның екі айырылуын көруге болады. Мәселен, смартфондар 2,7%-ға арзандаса, шаңсорғыш (–8,2%), үтік (–7,7%) және автокөліктер (–2,3%) бағасы да төмендеген. Ал керісінше, сымсыз құлаққаптар 2,2%-ға, теледидарлар 4,1%-ға, алтын сақиналар мен ас үй плиталары 5,5%-ға қымбаттады.

Қызмет көрсету секторында да өсім сақталды. Атап айтқанда, бассейн абонементі 3,3%, электрик қызметі 2,1%, тіс емдеу 1,6% қымбаттаған.

2025 жылдың наурызымен салыстырғанда сусабынның бағасы 13,9%, кір сабын – 7,3%, жайма дастархан – 6,5%, тұсқағаз – 3,3%, бөлме өсімдіктері – 3,2% өскен. Ал қызметтер арасында сәлемдемелерді жеткізу бойынша курьер қызметінің бағасы 14,3%, мерекелерді ұйымдастыру бойынша қызметтер – 10,8%, теледидарды жөндеу – 7%, балаларды дамыту орталықтарының қызметтері – 6,9% қымбаттаған.

Сонымен қатар жылдық инфляция деңгейі 11% болды, бұл ақпанмен салыстырғанда 0,7 пайыздық тармаққа төмен. Бір жыл ішінде азық-түлік бағасы 11,7%, азық-түлік емес тауарлар 11,3%, қызметтер 10% өскен.

Айта кетейік, тұтыну бағалары индексі ай сайын 537 түрлі тауар мен қызмет түрі бойынша есептеледі. 2026 жылдан бастап оның құрылымында азық-түлік тауарларының үлесі 41,1%, азық-түлік емес тауарлар – 28,4%, ал қызметтер – 30,5% құрайды.