Қазақстан мен Франция мал шаруашылығын дамытудың бірлескен жоспарын әзірлейді

Қазақстан мен Франция агроөнеркәсіп кешеніндегі ынтымақтастықты тереңдетіп, мал шаруашылығын дамыту бойынша бірлескен жол картасын әзірлеуге кіріседі. Бұл туралы Ауыл шаруашылығы вице-министрі Аманғали Бердалин Қазақстандағы Францияның Төтенше және Өкілетті Елшісі Сильван Гиогео арасындағы кездесу барысында белгілі болды, деп хабарлайды Kapital.kz іскерлік ақпарат орталығы.

Тараптар мал шаруашылығы саласын екіжақты кооперацияның негізгі бағыттарының бірі ретінде айқындап отыр. Әсіресе, Қазақстанның Франциядан асыл тұқымды мал импорттау және генетикалық әлеуетті күшейту мәселесіне басымдық берілді. Бұл бағытта мемлекеттік қолдау шаралары қарастырылған: салықтық жеңілдіктер және жылдық 6% мөлшерлемемен 7 жылға дейін жеңілдетілген несиелеу тетігі іске қосылған.

Кездесуде француздың Synetics компаниясы мен «Асыл түлік» АҚ қатысуымен селекциялық жобаларды жүзеге асыру мәселесі талқыланды. 2024–2028 жылдарға жоспарланған бұл ынтымақтастық аясында француз мамандары тартылып, озық генетикалық технологиялар енгізіледі. Қазіргі таңда тиісті келісімдер жасалып, генетикалық материалдарды жеткізу процесі басталған.

Сонымен қатар Қазақстан тарапы Еуропа елдерінің асыл тұқымды мал шаруашылығын реттеу тәжірибесін зерделеуге қызығушылық танытып отыр. Бұл заңнаманы жетілдіруге және саланың институционалдық негізін нығайтуға бағытталған.

Экспорттық әлеуетті арттыру да күн тәртібінде тұр. Атап айтқанда, Қазақстан жылқы етін Еуропа нарығына жеткізуді ұлғайтуды көздейді. Осы бағытта «Қайып Ата» компаниясы мен француздың Pegase BVS арасында Францияға өнім экспорттау жөнінде келісім жасалған.

Франция тарапы Қазақстанның 2026–2030 жылдарға арналған мал шаруашылығын дамыту жоспары аясында әріптестікті кеңейтуге дайын екенін білдірді. Ынтымақтастықтың басым бағыттары қатарында жасанды ұрықтандыру, эмбриондарды көшіру, жемшөп базасын дамыту, жайылымдарды басқару және саланы цифрландыру бар.

Кездесу қорытындысы бойынша тараптар аграрлық сектордағы әріптестікті жаңа деңгейге шығарып, бірлескен инвестициялық және ғылыми жобаларды іске асыруға ниетті екенін растады.