Анна Мигаль: Қазақстан — inDrive үшін стратегиялық нарық

Қазақстан inDrive үшін он жылдан астам уақыт бойы жай ғана қатысу нарығы емес, бизнесті ұлғайтуға арналған стратегиялық алаң болып келеді. Мұнда компания мультивертикалды модельді сынақтан өткізіп, тасымал нарығындағы позициясын күшейтіп, суперапп дамытуға басымдық беруде. Бәсекесі жоғары нарықтағы жағдай, маркетинг трансформациясы және 2026 жылға арналған жоспарлар туралы inDrive-тың EMEA және APAC аймақтары бойынша GTM-директоры Анна Мигаль айтып берді.

— Қалалық сапарлар нарығы өте бәсекелі. Қазақстан inDrive жұмыс істейтін басқа елдерден несімен ерекшеленеді?

— Біз 49 елде жұмыс істейміз, ал Қазақстан бизнес көлемі бойынша негізгі нарықтардың бірі. Компания мұнда 11 жылдан астам уақыттан бері жұмыс істейді – бұл біз үшін ең тұрақты әрі дамыған өңірлердің бірі.

Қазақстанның басты ерекшелігі – цифрландыру деңгейінің жоғары болуы. Банк секторы, телеком, e-commerce – бәрі халықаралық деңгейде дамып келеді. Пайдаланушылар таксидің жылдам келуі, ыңғайлы жеткізу, экожүйелік шешімдер секілді сапалы цифрлық сервистерге үйренген.

Бұл – қалыптасқан (жетілген) нарық. Адамдар жеке сервисті емес, бір қосымша ішіндегі кешенді шешімді күтеді. Сондықтан біз мультивертикалды модельді жүйелі түрде дамытып, суперапп форматына қарай жылжып келеміз.

Бүгінде Қазақстанда inDrive қалалық сапарлар, жеткізу қызметі және қалааралық сапарлар сегментінде көшбасшы ретінде ұсынылған. Бұл бағыт қарқынды дамып жатыр. Сонымен қатар азық-түлік жеткізу бағыты да дамуда. Өткен жылы біз inDrive.Продукты сервисін іске қостық – ол Алматы мен Астанада қолжетімді. Сондай-ақ дайын тағам өндіретін өзіміздің «Рядом by inDrive» сауда маркасын құрдық. Біз үшін қолданушының күнделікті қажеттіліктерін бір қосымша ішінде толық қамту маңызды.

Райд-хейлингке келсек, маркетинг тұрғысынан біз маркетплейс сияқты жұмыс істейміз — жолаушылар мен жүргізушілердің мүдделерін тең ұстаймыз. Екі тарап үшін де үш негізгі фактор маңызды: баға, сапа және қауіпсіздік.

Біздің P2P-модель – пайдаланушылардың бағаны тікелей келісуі – жергілікті менталитетке сай келеді. Қазақстанда таңдау еркіндігі мен әділдік сезімі жоғары бағаланады, бұл біздің бренд құндылықтарымен сәйкес келеді.

— 2025 жылғы қандай маркетингтік жобалар сіздер үшін ауыз толтырып айтарлықтай болды?

— 2025 жылы біз танымал актер әрі режиссер Нұрлан Қоянбаевпен ынтымақтастықты бастадық – ол Қазақстандағы бренд амбассадоры болды. Бұл өте сәтті коллаборация болды, ол 14 миллионнан астам адамды қамтыды. Біз ауқымды ұлттық науқанды іске қосып, кейін серіктестікті жалғастырдық. Нұрлан тек қалалық сапарлар бағытының ғана емес, сонымен қатар қалааралық сапарлар мен жеткізудің де бет-бейнесіне айналды. Қазір біз онымен жаңа жобаларды дайындап жатырмыз.

Тағы бір жарқын жоба – Sounded by inDrive. Біз жас қазақстандық ақындарға шығармашылық алаң ұсындық. Жоба Астанада күзде басталып, 20 миллионнан астам қаралым жинады. Бұл аудиторияға жылы әсер қалдырған эмоциялық жоба болды.

Сонымен қатар біз Alpha тобымен бірге қалааралық бағытты қолдауға арналған жобаны іске асырдық. Олар Қазақстанды inDrive арқылы аралап, сапарларын жастарға жақын форматта көрсетті. Жоба k-pop жанкүйерлері арасында танымал болды.

Тағы бір кейс – Нұрлан Қоянбаев пен Садраддин қатысқан «Кептелістегі студия» мобильді жобасы. Танымал тұлғалар жолаушыларды көлікпен жеткізіп, жол бойы сұхбат жүргізді. Жоба digital форматта белсенді насихатталып, 45 миллионнан астам қаралым жинады.

— inDrive әлеуметтік бастамаларды да белсенді жүзеге асырады. Олар маркетинг стратегиясында қалай көрініс табады?

— Біз үшін әлеуметтік бастамалар – жеке бағыт емес, брендтің ажырамас бөлігі. Әділетсіздікпен күрес идеясы компанияның негізінде жатыр. Бұл өнімде де көрінеді – төмен комиссия және жүргізуші мен жолаушы арасындағы еркін келісім.

Қазақстанда бізде көптеген әлеуметтік жобалар бар. Біздің міндет – олар туралы ақпарат таратып, пайдаланушыларға жаңа мүмкіндіктерді көрсету. Соның бірі – inDrive CEO-сы Арсен Томский негізін қалаған inVision U университеті. Бұл – Қазақстандағы ерекше форматтағы алғашқы университеттердің бірі, онда талантты студенттер толық грантпен білім алып, тұра алады.

Мысалы, біздің жүргізушілердің бірі қызына осы университетке түсуге кеңес беріп, қазір ол дайындық курсында оқып жатыр.

Сонымен қатар біз технологиялық көрмелер мен салалық іс-шараларға белсенді қатысып, стартап-экожүйені дамыту мен технологиялық кәсіпкерлікті қолдау туралы айтамыз. Гендерлік теңдікке де ерекше назар аударамыз. Осы бағытта әйел стартапшыларды қолдайтын Aurora Tech Award сыйлығы маңызды рөл атқарады.

Осылайша, әлеуметтік бастамалар бренд құндылықтарын күшейтіп, қоғаммен диалог құруға мүмкіндік береді.

— Басқа нарықтарда іске асырылған, бірақ Қазақстанда әлі жүзеге аспаған жобалар бар ма?

— Әр ел бірегей, кез келген жоба жергілікті мәдениетке бейімделуді қажет етеді.

Мысалы, Таяу Шығыста – Мысыр, Марокко, Алжир, Пәкістанда – біз жергілікті кампанияларды белсенді дамытып жатырмыз. Мысырда Рамазан айында арнайы адалдық бағдарламасын іске қостық: пайдаланушылар белгілі әрекеттер үшін «фануш» шамдарын жинады, ал белгілі бір деңгейге жеткенде қайырымдылық қорына қаражат аударылды.

Мароккода Африка кубогы кезінде біз дәстүрлі демеушіліктен бас тартып, жас футболшыларды амбассадор еттік. Бұл ерекше әрі әсерлі жоба болды. Осындай идеяларды Қазақстанда да бейімдеуге болады.

— 2026 жылға арналған негізгі басымдықтар қандай?

— Негізгі назар — жаңа вертикальдарды дамыту, әсіресе grocery бағыты. Сонымен қатар маркетинг трансформациясы жүріп жатыр. Біздің басты назарымыз – бір қосымшада бірнеше сервисті пайдаланатын multivertical user.

Қазір нарық жетілген болғандықтан, тек жаңа пайдаланушыларды тарту емес, бар аудиторияны белсенді ету де маңызды.

2026 жылы біз барлық бағыт бойынша ірі кампанияларды жалғастырамыз, Нұрлан Қоянбаевпен жұмысымызды жалғастырып, бренд позициясын нығайтамыз.

Grocery бағытын өзімізге үлкен міндетіп етіп қойып отырмыз. Біз пайдаланушылар пікіріне ерекше мән береміз және өнімді сол кері байланысқа сүйене отырып дамытамыз.

Сонымен қатар қауіпсіздік – басты басымдықтардың бірі. Біз сервисті барынша қауіпсіз әрі ыңғайлы ету үшін жаңа шешімдерді енгізіп жатырмыз.

Сондай-ақ, әрине, әлеуметтік жобалар миссиямыздың маңызды бөлігі болып табылады. Жақын уақытта бірнеше жаңа әлеуметтік бастаманы іске қосуды жоспарлап отырмыз.

— Жұмыс тәжірибеңіз туралы айтып берсеңіз или Қызмет жолыңыз қалай басталды?

— Мен маркетинг саласында 20 жылдан астам уақыт, ал inDrive-та – үш жылдан бері жұмыс істеп келемін. Қазір EMEA және APAC өңірлерінде go-to-market стратегиясына жауап беремін.

Бұған дейін e-commerce, банк және телеком салаларында еңбек еттім. Халықаралық тәжірибеден түйгенім: маркетинг бұл – ең алдымен адамдар мен мәдени контекст.

Жаңа нарықтармен жұмыс істеу бейімделуді және белгісіздік жағдайында шешім қабылдауды талап етеді. Бірақ дәл осы нәрсе кәсіби және жеке дамуға мүмкіндік береді.

Ал Қазақстан – осы тұрғыда ең қызықты нарықтардың бірі: жетілген, бәсекелі және инновацияларға ашық. Дәл осы жерде компанияның болашақ дамуын айқындайтын модель қалыптасып жатыр