Jibek Joly АЭА-да ірі зауыт пен жаңа ғылыми орталық құрылады

Таразда биотехнология саласын дамытуға бағытталған жаңа бастамалар талқыланды. Дулати университетінің басшылығы мен «Shengtai Biotech Co. Ltd» компаниясының өкілдері стратегиялық серіктестікті кеңейту және бірлескен жобаларды іске асыру мәселелерін талқылады, деп хабарлайды Kapital.kz іскерлік ақпарат орталығы.

Кездесу барысында Шу ауданындағы «Jibek Joly» арнайы экономикалық аймағында жүзеге асырылып жатқан ірі инвестициялық жобаның барысына ерекше назар аударылды. Жүгеріні терең өңдеуге арналған зауыт Fufeng Group корпорациясының қолдауымен салынып жатыр. Қазіргі таңда құрылыс жұмыстарының 80%-ы аяқталған.

Жоба екі кезеңде іске асырылады: алғашқы кезеңде жылына 3 млн тонна жүгері өңделсе, кейін бұл көрсеткіш 5 млн тоннаға дейін ұлғайтылады. Нәтижесінде кәсіпорын Орталық Азиядағы ең ірі биоферментация базаларының біріне айналмақ.

Зауытта валин, изолейцин, лейцин және глютамин сияқты өнімдер өндіріліп, халықаралық нарыққа экспортталады. Жоба аясында 1500 тұрақты жұмыс орнын ашу жоспарланған.

Бүгінде кадр даярлау мәселесі де күн тәртібінде тұр. Университет «Андасай» кен орнын қамтамасыз ету үшін 220 маман дайындауды көздеп отыр. Олардың қатарында биотехнологтар мен химиктерден бөлек, тау-кен инженерлері, геологтар және маркшейдерлер бар.

Сонымен қатар оқу орнында халықаралық компанияның индустриялық кафедрасын ашу және биотехнология бағытында академиялық кемелділік орталығын құру жоспарланып отыр. Бұл білім беру бағдарламаларын өндіріс талаптарына бейімдеуге мүмкіндік береді.

Тараптар кездесуде ғылыми-зерттеу жұмыстарын қаржыландырудың жаңа тетіктерін де талқылады. Атап айтқанда, университет жанынан эндаумент қорын құру және жер қойнауын пайдаланушылар табысының 1%-ын ғылымға бағыттау ұсыныстары қарастырылды.