Қазақстанның үш облысындағы су қоймаларында шағын ГЭС салынады

Қазақстанның үш облысындағы су қоймаларында шағын гидроэлектр станцияларын салу жоспарланып отыр. Қазір жобалық-сметалық құжаттама әзірленуде, деп хабарлайды Kapital.kz іскерлік ақпарат орталығы су ресурстары және ирригация министрлігінің баспасөз қызметіне сілтеме жасап.

«Су ресурстары және ирригация министрлігінің «Қазсушар» РМК Қарағанды облысындағы Самарқанд су қоймасында, Ақтөбе облысындағы Қарғалы су қоймасында және Абай облысындағы Қаракөл су қоймасында шағын гидроэлектр станцияларын салу бойынша жобалық-сметалық құжаттаманы әзірлеуде. Қазіргі уақытта барлық үш жоба мемлекеттік сараптамадан өтуде. Сондай-ақ тағы бес нысан бойынша жобалық-сметалық құжаттама әзірлеу жоспарланып отыр, оның ішінде үш жоба – жеке инвесторларды тарту арқылы», – делінген ақпаратта.

Айта кетілгендей, жұмыстар өткен жылдың қыркүйегінде қабылданған «Қазсушар» РМК гидротехникалық құрылыстарында шағын гидроэлектр станцияларын дамыту жөніндегі Жол картасы аясында жүргізілуде. Қазіргі таңда шағын ГЭС орнатуға жарамды 29 нысан іріктелді.

«Жол картасын іске асыру нәтижесінде «Қазсушар» РМК гидротехникалық құрылыстарында электр энергиясын өндірудің жалпы көлемі жылына 30 МВт-ты құрайды. Кәсіпорын теңгерімінде қазірдің өзінде үш шағын ГЭС бар. Олар Солтүстік Қазақстан облысындағы Сергеев гидроторабында, Қарағанды облысындағы Ынтымақ су қоймасында және Қорғас өзеніндегі «Достық» гидроторабында орналасқан», – деді су ресурстары және ирригация вице-министрі Ерболат Ибрайханов.

Айта кетейік, бұған дейін Ақмола және Қалғұты су қоймаларының құрылысы 2026 жылға жоспарланғаны хабарланған болатын. Сондай-ақ Теріс-Ащыбұлақ және Қарақоңыз су қоймаларын реконструкциялау көзделген.

Биылғы жылдың бірінші тоқсанының соңына дейін Қазақстанның шығыс өңірлеріндегі су қоймалары мен каналдарды толық қалпына келтіру жобаларын әзірлеуді аяқтау жоспарланып отырғаны да жарияланған еді.

Қазақстанда су саласын дамытудың кешенді жоспары қабылданған, оған 42 су қоймасын салу көзделген.