Қазақстанда жүк көліктерінің қозғалысына көктемгі шектеу енгізіледі
Еліміздің қай өңірлерінде қозғалысқа тыйым салынады?
Қазақстанның бірқатар өңірлерінде көктем мезгіліне байланысты ауыр жүк көліктерінің қозғалысына уақытша шектеулер енгізіледі, деп хабарлайды Kapital.kz іскерлік ақпарат орталығы Көлік министрлігіне сілтеме жасап.
Ведомство мәліметінше, 23 наурыз бен 1 мамыр аралығында Ақмола, Ақтөбе, Шығыс Қазақстан, Батыс Қазақстан, Қарағанды, Қостанай, Солтүстік Қазақстан, Павлодар және Абай облыстарындағы автожолдарда қозғалысқа шектеу қойылады. Тыйым жалғыз оське түсетін жүктемесі 8 тоннадан асатын жүк көліктеріне қатысты.
Мұндай шаралар жыл сайын көктемде қар еріп, топырақтың ылғалдануына байланысты жол негізі әлсірейтін кезеңде енгізіледі. Министрлік негізгі мақсат – жол жамылғысының бұзылуына жол бермеу екенін еске салды.
Сонымен қатар, еліміздің оңтүстік және батыс өңірлерінде шектеулер қазірдің өзінде күшіне енген. Алматы, Атырау, Жамбыл, Қызылорда, Маңғыстау, Түркістан, Жетісу және Ұлытау облыстарында ауыр жүк көліктерінің қозғалысы 1 сәуірге дейін шектелген.
Бұл ретте халықаралық жүк тасымалдарына, жолаушылар көлігіне, сондай-ақ азық-түлік, дәрі-дәрмек және төтенше жағдайларға арналған жүктерге аталған шектеулер қолданылмайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
