Цифрлық отбасы картасы арқылы 1 218 адамға жәрдемақы мен төлемдер тағайындалды

2026 жылдың басынан бастап Цифрлық отбасы картасы арқылы 3 828 адамға әлеуметтік-еңбек саласындағы мемлекеттік қызметтерді проактивті түрде алу үшін SMS-хабарламалар жіберілді. Олардың ішінде өтініш бермей-ақ жәрдемақы немесе әлеуметтік төлем алғандар саны 1 218 адамды құрады, деп хабарлайды Kapital.kz іскерлік ақпарат орталығы еңбек және халықты әлеуметтік қорғау министрлігінің баспасөз қызметіне сілтеме жасап.

Цифрлық отбасы картасы барлық мемлекеттік ақпараттық жүйелерден алынған деректер негізінде қалыптасады. Қазіргі таңда онда Қазақстанның 20 млн азаматы, яғни 6,2 млн-нан астам отбасы туралы ақпарат жинақталған.

Цифрлық картаның басты мақсаты – әрбір қазақстандыққа мемлекеттік қолдау жүйесіне тең қолжетімділікті қамтамасыз ету. Сол себепті ҚР Әлеуметтік кодексінде карта әлеуметтік саясаттың орта және ұзақ мерзімді міндеттерін анықтайтын құрал ретінде белгіленген. Сонымен қатар, карта азаматтарға олардың әлеуметтік мәртебесіне байланысты кепілдендірілген мемлекеттік қолдау түрлерін алу құқығы туралы күнделікті электрондық ескертуші ретінде қызмет атқарады.

Қазіргі таңда карта арқылы азаматтар өтініш бермей-ақ әртүрлі әлеуметтік төлемдер мен жәрдемақылар ала алады. Оларға еңбек қабілетін жоғалтқан жағдайда, жұмыссыз қалған кезде, асыраушысын жоғалтқан жағдайда төленетін төлемдер, бала туу және баланы күту бойынша жәрдемақылар, мүгедек баланы тәрбиелеп отырған ата-ана немесе қамқоршыға арналған төлемдер, мүгедектік бойынша жәрдемақылар, көпбалалы отбасылар мен «Алтын алқа» және «Күміс алқа»-мен марапатталған аналарға берілетін төлемдер, сондай-ақ атаулы әлеуметтік көмек пен бір реттік жерлеу төлемі кіреді.

Сонымен қатар, карта арқылы зейнетақы төлемдерін алу, «қандас» мәртебесінің мерзімін ұзарту немесе жұмыссыздарға арналған әлеуметтік қызметтер туралы автоматты ескертулер жіберіледі.

Мемлекеттік қолдауға құқығы бар азаматқа SMS-хабарлама 1414 біртұтас байланыс орталығы арқылы жіберіледі. Хабарламаны алған адам оны растап, келісім бергеннен кейін әлеуметтік төлем немесе жәрдемақы автоматты түрде тағайындалып, қаражат банк шотына аударылады.

Еңбек министрлігі алаяқтық тәуекелін болдырмау үшін SMS-хабарламаларға тек 1414 нөмірінен жауап беруді ескертеді. Кез келген сұрақ бойынша 1414 Call-орталығына хабарласуға болады, қоңырау тегін.

Айта кетейік, 2026 жылы атаулы әлеуметтік көмектерге бюджеттен 62,7 млрд теңге қарастырылған. Ал қаңтар айында 2,3 млрд теңге әлеуметтік көмек ретінде тағайындалған. Бұған дейін әлеуметтік көмек алушылар саны 30%-ға қысқарғаны хабарланған болатын.

Сонымен қатар, Қазақстанда жасанды интеллект технологиясы арқылы атаулы әлеуметтік көмек тағайындау жоспарланып отыр. Пилоттық режимде отбасылардың әл-ауқатын анықтайтын скоринг моделі іске қосылған.