Қазақстанда мұнай бағасының күрт өзгеруіне байланысты бензин қымбаттай ма?

Энергетика министрі Ерлан Ақкенженов әлемдік мұнай нарығындағы тұрақсыздық Қазақстандағы бензин бағасының өсуіне әкеп соқпайды деп мәлімдеді, деп хабарлайды Kapital.kz іскерлік ақпарат орталығының тілшісі.

Оның сөзінше, мұнай бағасы қазіргі уақытта қатты құбылып тұр. Күні кеше ғана бір баррельдің құны 119 долларға дейін көтерілгенімен, қазір шамамен 87 долларға дейін төмендеді.

«Сондықтан баға 80 доллар шамасында болуы үшін алдын ала негіздер бар. Себебі біз баспасөзден оқып, Парсы шығанағы елдеріндегі мұнай инфрақұрылымына шабуылдар Абъян (Йемен) аймағында жүргізіліп жатқанын байқап отырмыз. Әрине, бұл нарықтағы нақты мұнайдың азаюына әсер етті. Сондықтан осы себептен баға сақталуда», — деді Ерлан Ақкенженов мәжіліс сыртында.

Ведомство басшысы мұнай бағасының ауытқуы Парсы шығанағы елдеріндегі энергетикалық инфрақұрылымға жасалған шабуылдармен тығыз байланысты екенін атап өтті. Оның айтуынша, мұндай оқиғалар шикізат ұсынысын уақытша азайтады.

Соған қарамастан, министр атап өткендей, Қазақстанда жанармай бағасына қатысты жағдай тұрақты болып отыр.

«Парсы шығанағы елдері мен Америкадағы бензин бағасына бұл әсер етуде. Біз оны жаңалықтардан көріп отырмыз. Қазақстанда – жоқ», – деді ведомство басшысы.

Министр сондай-ақ әлемдік мұнай бағасының одан әрі құбылуы Таяу Шығыс елдеріндегі қақтығыстың қалай өрбитініне байланысты болатынын айта кетті.

Бұған дейін хабарланғандай, Қазақстан Ұлттық банкі 2026 жылға арналған мұнай бағасы болжамын Таяу Шығыстағы жағдайға байланысты көтеру бағытында қайта қараған.

Айта кетейік, Brent Crude Oil маркалы мұнай фьючерстік бағамдары ICE Futures Europe биржасында күрт көтерілді. Сауда деректері бойынша, 2026 жылғы мамыр айына жеткізуге арналған келісімшарт құны бір баррельге 116,67 долларға жетті. Мұнай бағасы бір апта ішінде 30%-дан астам өсті, бұл 1980-жылдардан бергі ең үлкен апталық өсім болды. Содан кейін котировкалар төмендей бастады. Мысалы, 11 наурыз, сейсенбі күні кешке мұнай бағасының төмендеуі күшейді. Лондондағы ICE Futures биржасында мамыр айына арналған Brent фьючерстерінің құны сағат 20:40 Ast дерегі бойынша 11,48%-ға төмендеп, бір баррельге 87,6 долларға жетті.

Өткен аптада Таяу Шығыс елдерінде мұнай супертанкерлерінің фрахт құны аймақтағы қақтығыстың күшеюі және Ормуз бұғазы арқылы кемелер қозғалысының нақты тоқтауына байланысты рекордтық максимумға жетті.

Иран Ислам революциясы корпусының қолбасшылығы мұнай танкерлерінің Ормуз бұғазы арқылы қозғалысын толық тоқтататынын мәлімдеді.

Сондай-ақ, 28 ақпанда Израиль мен АҚШ Иран территориясына ядролық бағдарламаны жою мақсатында соққы жасады. Одан кейін жауап ретінде Израиль мен Таяу Шығыс елдерінің бірнеше мемлекетіне – БАӘ, Сауд Арабиясы, Катар, Бахрейн, Кувейтке шабуыл жасады. 1 наурыз жексенбі күні Иран тарапынан елдің көшбасшысы аятолла Али Хаменейдің қаза болғаны расталды.