Кеңес Рақышев АХҚО-да компаниясын тіркеді

Fincraft Group иесі Кеңес Рақышев Астана халықаралық қаржы орталығында жаңа Fincraft Energy Holding Limited атты компаниясын тіркеді, деп хабарлайды Kapital.kz іскерлік ақпарат орталығының тілшісі АХҚО сайтына сілтеме жасап.

Компания Астанада 2025 жылғы 10 қарашада тіркелген. Оның қызметі «холдингтік» деп белгіленген. Жаңа ұйымның жарғылық капиталы: 50 млн доллар.

Fincraft Energy Holding Limited компаниясының СЕО-сы Павел Мынжанов болып саналады – ол сондай-ақ Fincraft Resources директорлар кеңесінің мүшесі.

Еске салсақ, Кенес Рақышев өзінің портфелінен тау-кен активтерін ғана емес, сонымен қатар қаржылық активтерді де біртіндеп шығарып, мұнай-газ активтеріне инвестиция салып жатыр. 2024 жылдың қазан айында Kapital.kz тілшісімен әңгімелесу барысында бизнесмен бұл Fincraft Group стратегиясы екенін нақтылаған болатын.

«Біз әртүрлі мұнай өнімдерін, яғни жоғары қосылған құны бар тауарларды алу үшін мұнайды терең өңдеуге де назар аударғымыз келеді», – деп атап өтті ол.

Мәселен, 2023 жылдың қыркүйек айында Fincraft Resources KASE-ге компанияның «ИндерГипс» ЖШС-дағы 100% қатысу үлесінен айырылғаны туралы хабарлаған. Ал 2024 жылдың қаңтар айында Кенес Ракишев Fincraft Resources арқылы мұнай және ілеспе газ өндіретін Nomad west oil компаниясында 50% үлесіне ие болды.

2024 жылдың маусым айында Кенес Ракишев «SNRG Capital Eurasia» ЖШС арқылы БТА-ның еншілес компаниясы – БТА Беларусь-ті қазақстандық кәсіпкер Сұлтан Мареновке сатты. Мәміле сомасы 230 млн теңгені құрады. Кейін банк атауын «Нео Банк Азия» ЖАҚ (Neo Bank) деп өзгертті.

Сол жылдың желтоқсан айында Fincraft Group тобы БТА Банкінің 29,64043% акциясына иелігін тоқтатты.

«Бұл холдингішілік мәміле болып табылады: «БТА Банк» АҚ акцияларының бір бөлігі түпкі бенефициары Fincraft Group құрылтайшысы Кенес Ракишев болып табылатын компанияның басқаруына берілді. Бұл сондай-ақ «БТА Банк» АҚ-тың біздің компания үшін профильдік актив болуды тоқтатқанымен байланысты», - деп хабарлады Fincraft Group баспасөз қызметі.

Компания мәміледен кейін Кеңес Рақышев әлі де «БТА Банктің» акцияларының 100% пакетінің иесі болып қала беретінін нақтылады: оған Банктің дауыс беретін акцияларының 70,07%-ы және ол жалғыз құрылтайшы болып табылатын компания арқылы дауыс беретін акциялардың 29,64043%-ы тікелей тиесілі.

2019 жылы ол БТА Банкті (Қырғызстан) сатқан, ол 2020 жылы жергілікті «Бакай банкімен» біріктірілген. БТА Банк (Украина) және «Казникель» ЖШС сатылу процесінде.

Fincraft Resources есептілігінде 2023 жылдың шілде айында топ басшылығы «Казникель» ЖШС-ін сату туралы шешім қабылдағаны хабарланған.

««Казникель»-дің 100% жай дауыс беретін акцияларын жеке BMT Nico компаниясына (ол Fincraft Resources тобына кіреді - ред.) сату жоспарланып отыр. Тиісті құжаттарға қол қойылды. Сату 2024 жылдың бірінші жартыжылдығында аяқталады деп күтілуде», – делінген топтың қаржылық есебінде.

2024 жылдың қазан айында Kapital.kz-ке берген сұхбатында Кенес Ракишев компанияны шетелдік инвестор сатып алатынын хабарлады.

2025 жылдың наурыз айында Кенес Ракишев өзінің мұнай активі – «ARK Petroleum» ЖШС-ін сатты. Ол мұнай және ілеспе газ өндірумен айналысады және Маңғыстау облысындағы Шалва кен орнында мұнай барлау жұмыстарын жүргізуге арналған келісімшарт бойынша оператор болып табылады.

Бұған дейін бизнесмен бұл компанияда Fincraft Resources арқылы 50% үлесіне ие болған.:

«Үлестің 25%-ы «Hauling-1» ЖШС-не, қалған 25%-ы «ЦЕНТР-ЭНЕРГО» ЖШС-не сатылды», деді Fincraft түсіндірмесінде.

Бұл активтегі үлестің қандай бағамен сатылғаны және мәміленің басқа да нюанстары белгісіз болып отыр.