WhatsApp балаларға арналған арнайы аккаунтты іске қосады
Ата-аналар баланың кіммен хат алмасып, қандай топтарға қосылатынын бақылай алады
WhatsApp мессенджері балаларға арналған ата-ана бақылауындағы жаңа аккаунттарды іске қосуды жоспарлап отыр. Бұл функция ата-аналарға немесе қамқоршыларға балалардың мессенджерді пайдалануын бақылауға мүмкіндік береді, деп хабарлайды Kapital.kz іскерлік ақпарат орталығы.
Компанияның мәліметінше, жаңа жүйе ата-аналардың және сарапшылардың ұсыныстары негізінде әзірленген. Ата-аналар арнайы басқару құралдары арқылы балалардың аккаунтын хабарламалар мен қоңыраулармен ғана шектеуге, сондай-ақ олардың кіммен сөйлесе алатынын анықтай алады.
Аккаунтты іске қосу үшін ата-ананың жеке телефоны және балаға арналған құрылғы қажет. Аккаунтты баптағаннан кейін ата-ана немесе қамқоршы баланың кіммен хат алмасатынын, қандай топтарға қосылатынын бақылап отырады. Сонымен қатар белгісіз пайдаланушылардан келген хабарлама сұраныстарын қарап, құпиялық баптауларын өзгерте алады.
Жаңа аккаунттағы ата-ана бақылауы PIN-код арқылы қорғалады. Яғни құпиялық параметрлерін тек ата-аналар ғана өзгерте алады.
Бұған қоса, компания жеке хат-хабарлардың қауіпсіздігі сақталатынын да атап өтті. Барлық жазбалар соңынан соңына дейін шифрлау (end-to-end encryption) арқылы қорғалады, сондықтан оларға ешкім, тіпті WhatsApp-тың өзі де қол жеткізе алмайды.
Жаңа функция алдағы айларда кезең-кезеңімен іске қосылады. Компания бұл мүмкіндік мессенджерді балалар үшін қауіпсіз әрі бақылауға ыңғайлы етуге бағытталғанын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
