Астанада LRT тарифі қандай болады: билет бағасы мен тегін жүретіндер тізімі
Тариф қолма-қол және қолма-қолсыз төлем тәсілдері арқылы төленген жағдайда қолданылады
Астана қаласында жеңіл рельсті көлік – LRT арқылы жолаушылар мен багажды тасымалдауға арналған тарифтер бекітілмек. Тиісті құжат Ашық НҚА порталында жарияланды, деп хабарлайды Kapital.kz іскерлік ақпарат орталығы.
Ұсынылған құжатқа сәйкес, LRT-де жол жүру құны 200 теңге болады. Бұл тариф қолма-қол және қолма-қолсыз төлем тәсілдері арқылы төленген жағдайда қолданылады. Жолаушылар мен багаж үшін тариф бірдей.
Ал жеңілдікті көліктік картасы бар азаматтар LRT-де тегін жүре алады. Мұндай мүмкіндік Астана қаласы мәслихаты бұрын қабылдаған, қоғамдық көлікте жекелеген санаттағы азаматтарды жолақы төлеуден босату туралы шешім негізінде қарастырылған. Тегін жүру құқығын растау үшін жолаушы электрондық атаулы көлік картасын көрсетуі тиіс.
Қазақстан заңнамасына сәйкес, қалалық рельсті көлік – жеке бөлінген жолдармен жүретін және жолаушылар мен багажды әлеуметтік маңызы бар тұрақты бағыттар бойынша тасымалдайтын қалалық көлік түрі. Ол метрополитен мен теміржолға қарағанда габариті, жүк көтергіштігі және қозғалыс жылдамдығы жағынан шағындау.
Сонымен қатар қолданыстағы заңға сәйкес 7 жастан 15 жасқа дейінгі балалар жолақының 50%-ын төлеп жүруге құқылы.
Қалалық рельсті көлік арқылы әлеуметтік маңызы бар тасымалдарды ұйымдастыру жергілікті атқарушы органдардың құзыретіне жатады. Сондықтан LRT тарифтері де қала деңгейінде бекітіледі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
