Астанада қазақстандық сүт өнімдерін өндірушілердің фирмалық дүкендері көбейеді

Ақмола облысына жұмыс сапары аясында Сауда және интеграция министрі Арман Шаққалиев өндіріс мәдениеті жоғары және инфрақұрылымы дамыған үлгілі агроауыл саналатын Родина ауылында болды. Жүйелі мониторинг деректеріне сәйкес, әлеуметтік маңызы бар азық-түлік тауарларының, ішінде отандық өнімдердің үлесі ел бойынша 83%-ға жеткен. Ал сүт өнімдері санатында қазақстандық брендтердің үлесі 70%-дан 90%-ға дейін аралығында, деп хабарлайды Kapital.kz іскерлік ақпарат орталығы сауда министрлігінің баспасөз қызметіне сілтеме жасап.

Бұл көрсеткіштерді нығайту үшін министрлік сауда желілері, кәсіпкерлер палаталары және аумақтық сауда департаменттері арасында үшжақты меморандумдар жасасуды қолға ала бастады. Мұндай келісімдер фермерлерге сауда сөрелеріне қолжетімділік берсе, тұтынушылар үшін артық үстемақысыз әділ бағаны қамтамасыз етеді.

Ірі өндірушілердің фирмалық дүкендер желісін дамытуға ерекше назар аударылып отыр. Атап айтқанда, «Родина» ЖШС мен «Зенченко» ҰС секілді кәсіпорындардың сауда нүктелері кеңейтілуде. Қазіргі уақытта Астанада осындай 15 дүкен жұмыс істейді. Жыл соңына дейін олардың санын 20-ға дейін жеткізу жоспарланған. Бұл қала тұрғындарына өнімді делдалсыз, тікелей өндірушіден сатып алуға мүмкіндік береді.

«Біздің міндетіміз – өнімнің егістіктен тұтынушыға дейінгі толық цифрлық жолын қалыптастыру. Бұл азық-түлік қауіпсіздігін және баға тұрақтылығын қамтамасыз етеді. «Сауданың цифрлық айнасы» моделін енгізу арқылы өнімнің қозғалысын барынша ашық етеміз. Бүгінде сөрелердегі отандық өнім үлесі 83%-дан асқан жағдайда, біз үздік агроауылдардың тәжірибесін бүкіл елге таратып, азық-түлік қауіпсіздігін әр отбасының әл-ауқаты мен баға тұрақтылығына айналдыруды көздейміз», – деді Арман Шаққалиев.

2025 жылы ішкі сауда субъектілерін мемлекеттік қолдау жаңа деңгейге шықты. Жалпы сомасы 67,5 млрд теңгені құрайтын 458 жоба іске асырылды. Бұл қаражат сауда нысандарын жаңғыртуға, инфрақұрылымды дамытуға және айналым қаражатын толықтыруға бағытталды.

Сонымен қатар мемлекеттік қолдау алушыларға қарсы міндеттемелер жүктеледі. Олар өз сауда орындарында қазақстандық тауарлардың басымдығын қамтамасыз етуі тиіс.

Инфляциялық қысымды төмендету мақсатында үкімет «тиімсіз» делдалдарды алып тастайтын цифрлық құралдарды енгізуде. Солардың бірі – фермерлер мен сауда желілерін тікелей байланыстыратын инновациялық агромаркетплейс.

Бұған қоса, бірқатар өңірлерде әлеуметтік осал топтарға арналған цифрлық азық-түлік ваучерлері жүйесі пилоттық режимде енгізілуде. Бұл құрал арқылы азаматтар тауарларды 25%-ға дейінгі жеңілдікпен сатып ала алады.

Қазақстанның Еңбек Ері Иван Сауэр негізін қалаған «Родина» ЖШС-нің табысты тәжірибесін алдағы уақытта республика бойынша кеңінен тарату жоспарланып отыр.

Бұған дейін Ақмола облысында емдік сүт өнімдерін өндіру жоспарланып отырғаны хабарланған еді. Сондай-ақ Қостанай облысында 1200 басқа арналған сүт-тауар фермасы іске қосылды.